3rd round lut zingah top seed Swiatek

Nikuma Wimbledon quarter-final thleng Iga Swiatek chuan kumin hian a la champion lohna grass-court grand slam tournament kal laiah women’s singles third round a lut ve leh ta phawt a, Ningani zan second round inkhel pakhatah straight-set hmangin Petra Martic a hneh.
Polish world number one hi Centre Court-ah Croatian Martic chuan a nawr ve viau a, mahse, set hnih an khelh tawp lam ve veah a serve a hloh a, Swiatek hian 6-4 6-3 hnehna a chang.
Grand Slam title panga la tling tawh Swiatek kha a match khelh hnuhnung vawi 21-ah a la chak fai vek a; kumin hian champion lai a tlak fel tawh bawk avangin quarter-final a la pelh zawh lohna SW19-ah hian kumin chu champion turin rin a kai chho ta hle a ni.
Third round lama kum 23-a upa Swiatek-i tum leh tur Kazakh Yulia Putintseva chuan second round match dangah 6-0 4-6 6-2-in rinkai zawk Czech 27th seed Katerina Siniakova a barakhaih a, world number one lakah ‘upset’ dang a beisei zui leh dawn a ni.
Tournament ni lina women’s draw inkhel dangah American fifth seed Jessica Pegula chu kumin Wimbledon hmeichhe singles lama rank nei sang tla langsar ni lehin, world number 42 Wang Xinyu chuan 6-4 6-7 (7-9) 6-1-in a barakhaih a, Chinese player hian third-round tie lamah Britain innghahna pakhat Harriet Dart a hmachhawn zui leh ang.
French 23rd seed Caroline Garcia pawh round thumna lut zo lo langsar zingah telin, American world number 97 Bernarda Pera chuan 6-3 3-6 6-4-in a vaw tla.
Kum 2022 champion Elena Rybakina pawhin set khat hloh chungin German Laura Siegemund lakah 6-3 3-6 6-3 hnehna a chang a, Kazakh player tum leh tur hi world number one hlui Caroline Wozniacki kha a ni.
Kum 33-a upa Dane Wozniacki hian a la tar lo tih lantirin Canadian 30th seed Leylah Fernandez chu 6-3 2-6 7-5-in a hneh.
Wimbledon hnuhnung kum hnih chhunga runner-up ni ve ve Ons Jabeur pawh khan a champion kum nghahchhuah tumin a kawnga awm tawh phawt chu a la paltlang ve zel rih a, Ningani zan pawh khan American Robin Montgomery lakah 6-1 7-5 hnehna a chang ve leh.
Tunisian 10th seed hian third round lamah 21st seed Elina Svitolina a su leh dawn a, Ukrainian Svitolina hi 6-3 6-4-a German Jule Niemeier hnehtu a ni.
American 11th seed Danielle Collins pawhin Hungary mi Dalma Galfi lakah 6-3 6-4 hnehna changin, walkover-a tlang Brazilian 20th seed Beatriz Haddad Maia a tum leh ang.
Nikum quarter-finalist Madison Keys pawhin Chinese Wang Yafan lakah 6-2 6-2 hnehna changin, 2017 French Open champion Jelena Ostapenko lakah 6-3 6-0-in Ukraine player Daria Snigur a tlawm.