French ten far-rights te hnawl

French te chuan thuneihna chang turin far-right te an duhlohna lantirin an hnawl.
European election ah hneh takin far-right te an thlang tling a, parliamentary election first round-ah pawh an tlin hnem tir hle.
Mahse a pawimawh lai berah French te chuan far-right te chu an hnawl tlat a. National Rally (RN) te chu pathumna an ni pha chauh a. Kar kalta kha chuan seat 300 vel la tura rin an nih laiin seat 150 vel chauh la theiin French tam tak te chuan RN ten thuneihna an chan loh theih nan vote thlakin an pen chhuak a ni.
RN te chuan chhuanlam siam theih an neih thung chu party dang zawngte chuan RN paihthlak hrim hrim tuma an tanrual vang an ti thei.
Left party hrang hrangte chuan an inngeih lohna dah thain anti-RN coaltion siamin, Macronites leh left te pawhin an inmillohna te an theihnghilh an ti bawk.
Heng politician centre right hotu Eduoard Philippe te, Trotskyist left hotu Philippe Poutou te ang chu thawkho thei an ni lo va, an thawhho theihna awm chhun chu RN an dodal hrim hrim vang a ni an ti bawk a. Ngaihdan inang lo bur an neih avangin kal rei thei an ni lo an ti bawk.
French mipui nawlpui chuan far right tena thuneihna an chan chu an duh lo tih erawh a chiang a, an idea an hnawl tihna ni lovin, tuna thuneihna an chang a nih chuan France-in buaina nasa zawk a tawh an hlau a ni.
RN-in an hmatheh Jordan Bardella chu prime minister a nih dawn tak lohah chuan tu nge ni ang tih chu hunin a hril tur a ni a, a kar a kar nghah ngai a ni thei. A chhan ber pawh tun hnai kar lawka French political system inthlak danglam lutuk avangin thil chiang a awm lo.
Charles de Gaulle hnua inthlan apianga la chuh Alian Duhamel chuan, “Vawiinah chuan party chak bik a awm tawh lo. Macron an kum sarih kaltaa thuneihna a chan atang khan kan political forces te a darh chhe zel a ni” tia sawiin, “Tunah chuan insiam that lehna hun kan tan chiah bawk,” tiin a sawi.
A sawi awmzia ber chu France chuan political forces thahnem tak a nei tawh a tihna niin major bloc lian pathum- left, far-right leh centre te bakah centre-right an la awm bawk a. Heng chhungah hian party hrang hrang ten an la inchuh bawk.
Assembly-ah thuneihna chang zo party pakhat mah an awm loh avangin sorkar thar a pian theih nan coalition a awm ngei a ngai dawn a, chu chu centre-right atanga left te thlengin an inrem a ngai dawn a ni.
Tun dinhmunah chuan France-a thuneihna chang tur a la chiang lo hle a, President Macron chuan hmalakna a nei zui ang a, mahse, Olympics zawh hnu lamah thil a fel theih hmel chauh bawk.
Inbiakna kalpui a ni ang a, party hrang hrang te nen sawihona neih a ni ang a, thil chiang tak chu France chuan parliamentary system a lut dawn tihna a ni thung.
Sorkar thar kaihruaitu chuan President Macron thuneihna tam tak chu a chhuhsak lo thei dawn lo. Macron-an tu nge prime minister-ah a dah ang centrist a ni ang em tihte chu inrinsiak nghal a ni bawk.
Bloc pathum zinga tumahin majority an nei pha lo va, seat 577 awmah majority atana mamawh seat 289 la pha an awm lo.
France inthlanah hian RN tena thuneihna an chan duh lo hrim hrimin inthlan thawh hnihna neihah RN te paihthlak an niha vote a darh loh nan candidate 200 chuangin an chuh nawn duh lo a ni.
RN te chak an duh loh avanga France mipuite chet lakna chu chiang takin vote tlaah a lang bawk a, vote tla 66.63% lai niin kum 1997 hnua vote tlak that ber tum a ni bawk.