PM Modi Moscow zinin ngaihven hlawh

Prime Minister Narendra Modi-an Moscow a tlawh chuan ngaihven hlawh hle in, July 8-a Russian President Putin nena an inpawm chuan Washington leh Kyi-ah ngaihthatlohna thlenin mahse India chuan Russia nena an inzawmnaah hlauhthawn tur a awm lo a ti ve thung.
“India chuan UN charter te, territorial integrity leh sovereignty zahsak te a ngai pawimawh reng a ni” tiin Indian official te chuan an sawi nghal a. Modi chuan Putin hnenah ‘indona tualzawlah solution a awm lo’ tia hrilhin ‘dialogue leh diplomacy’ chauh chu hma lam pana kaltirna thlen thei a ni a ti tiin Indian government official te chuan an sawi.
Ukrainian President Volodymyr Zelensky chuan Putin leh Modi te inhmuh hun takah ngaihthatlohna a nei a, Russia in Ukraine missile 40 chuang hmanga beia mi 37 lai in nunna an chanphah lai taka neih a ni a. Modi-Putin meeting leh India-Russia Annual summit Kremlin a neih lai chu NATO leader leh western allies te Washington a Zelensky pawh tela an inhmuhkhawm lai tak a ni bawk.
Social media platform-a Russia missile strike-in a tihchhiat leh pawi a khawihte a post naah Zelensky chuan Putin leh Modi inhmuhna chu hrilhhaithlak a tih thu a sawi a.
“Khawvela democracy ram lian ber (India) leader-in khawvela misual thisenchhuahtu turu ber (Putin) a kuah hi hrilhhaithlak tak leh remna a awm theih nana hmalakna tithuanawp thei a ni” tiin Zelensky chuan a sawi.
Zelensky hian Prime Minister Narendra Modi chu Italy a G-7 outreach neihnaah thla kalta lawk khan lo hmu tawhin inremna a awm theih nana hmalakna lamah inrawlh turin a lo ngen tawh a ni. Mahse, Switzerland a a summit neih zuiah India chuan official delegation a tir chungin mahse statement siamah a inhnamhnawih duh lo thung a. Russia leh Ukraine te chuan dawhkan kil dunin inremna siam se a ti hlauh thung.
Modi-an Moscow a tlawh hi khawthlang ram te chuan langsar takin an duhlohna an lantir bawk a. Kum 2022 a Ukraine indona awm atanga Modi an Moscow a tlawh hmasak ber a ni bawk. July 8 khan President Putin chuan Modi chu lo dawngsawngin a hnua video tihchhuahah ram pahnih hruaitu te chuan golfcart ah te chuang dunin, Moscow daifema Novo-Ogaryovo a estate te dangin sakawr chaw an pe lai leh zan lam hun an hman laite tihchhuah a ni.
July 9 zing khan Indian community te hmaa thusawina a neihah Modi chuan President Putin chu ‘Kum sawm hnih chuang Russia a kaihhruai tawhnaah leh India-Russia inzawmna tihngheh a nihna zelah’ a fak a ni.
Hetih lai hian Washington-ah thung chuan President Joe Biden chuan NATO leader leh Ukraine president Volodymyr Zelensky te chu special summit atan a mikhual thung a.
State Department thupuang chuan US -in India leh Russia inlaichinna chu an ngaihven reng tiin a sawi a. Zawhna tam tak zawh a nih zingah Modi-an Russia a tlawh mek chungchang chu spokesperson Mathew Miller chuan US chuan India chu Ukraine buaina chinfelna turah UN charter, Ukraine territorial integrity leh sovereignty te chu zah a ni ngei tur a ni tih a tichiang tur a ni tiin a sawi.