Joe Biden-an Ukraine air defence thuam \hat a ni ang ti

US President Joe Biden chuan Russian missile kahchhuahin Ukraine ah mi 38 lai nunna a laksak hnuah ‘Russia nunrawnna inhrilhhriat nawn lehna’ tia sawiin Kyiv air defence tihchak a tiam zui bawk.
Russia-in Ukraine a beihna avang hian mi 190 chuangin hliam an tuar bawk a, chung zingah chuan Kyiv a Children hospital pawh a khawih pawi zingah a tel a ni.
Thawhlehni khan Washington-ah Nato summit neih ni bawkin US president chuan Ukraine air defence thuamthat nana ruahmanna a tlangzarh dawn bawk a ni.
Nato summit-ah hian member ram 32-a hruaitu lawkte tel vek dawnin leh EU aiawhte pawh an tel ang a, Nato kum 75-na a ni chiah bawk. Biden chuan Nato summit-ah hian Ukraine President Volodymyr Zelensky chu sawm tel a nih thu a sawi bawk.
“Russian airstrikes laka mipuite an him nan Ukraine air defence thuamchak a ni ang a. President Zelensky nen inhmuin Ukraine kan thlawpna a nghin loh zia pholan a ni ang” tiin Biden chuan a sawi.
Ukraine ngenna angin Thawhlehni vek khan UN Security Council pawhin meeting an nei a. UN Secretary General Antonio Guterres chuan Russia in Ukraine missile hmanga a bei vak chu a dem thu a sawi.
Kyiv mayor Vitali Klitschko chuan July 9 chu Russia-in a beihna avanga nunna chante sunna ni tiin a sawi a.
Ukraine-a paediatrics facility lian ber Ohmatdyt Children’s Hospital chu Russia missile-in a thenlai kapin mi pahnihin nunna an chan nghal a, in chimin a delhte chhanchhuah hna thawh zui nghal a ni bawk.
President Zelensky chuan Western allies te chu air defence an pek tur tichak turin a ngen zui bawk a. Kyic chuan US siam Patriot air defence system chu an mamawh ngawih ngawih thu sawiin mahse Western officials te chuan Nato member ram hrang hranga dah mek air defence te chu sawn an hreh deuh bawk si a ni.
Hetih lai hian Russian officials te chuan Rostov region a power substation-ah kangmei a chhuak tiin an sawi a Ukraine ram ri hnaiha power station hi zan lamah drone hmanga beih a ni tiin an sawi a.
Regional governor Vyacheslav Gladkov chuan Ukraine-in tun hnaia drone hmanga a beihna avangin mi pali in nunna chan tawhin mi 20 chuangin hliam an tuar tawh tiin a sawi.
Russia chuan Kyiv a Children Hospital chu an bei lo tiin thuchhuah an siam thung a. President Putin thupuangtu Dmitry Peskov chuan ‘Civilian target kan bei lo’ tiin a sawi.
Russia chuan damdawi in chu Ukrainian air defence missile kehthem in a den zawk a ni tia sawiin Ukraine thung chuan Russian cruise missile kang bang an hmu an ti ve thung.
Ukrainian President Volodymyr Zelesnky chuan Russia chet dan chu ‘nunrawng’ tia sawiin Russian president Vladimir Putin chu ‘bloody criminal’ tiin a sawi bawk.
Zelensky chuan Russia chuan Thawhtanni bik khan missile 40 hmanga Ukraine beiin Kyiv, Dnipro, Kryvyi Rih, Sloviansk leh Kramatorsk ah building 100 chuang an tichhia tiin a sawi.
UK Prime Minister Sir Keir Starmer chuan Russia chetdan chu na taka sawiselin ‘demawm takzet’ tiin a sawi a. Sir Keir chuan a sorkar chuan Kyiv a thlawp tlat dawn a ti zui bawk.
Nato summit chu Russia-in a ngaihven hle a. President Putin thupuangtu Dmitry Peskov chuan Kremlin chuan uluk takin Nato summit chu a thlithlai reng dawn tiin a sawi. “Nato alliance hian a tum ber chu langtlang chiang taka indona tualzawla Russia hneha awmtir a ni” tiin Peskov chuan a sawi.