Mizoram badminton inelna lianah record thar

Thla hmasa June ni 25 atanga khelh tan NEXA GIG Motors MBA Official Championship 2024 (Junior & Senior) chu karliamta Inrinni khan khelh zawh niin, Mizoram badminton record thar engemawzat kan hmu.
Junior category (Under-11 atanga Under-19 inkar) bik hi June ni 25-29, 2024 chhung khan khelh niin, senior category bik erawh July ni 2, 2024 atang khel tanin Inrinni khan a hmawr bawk a ni.
Chanmari West venga khawsa, Chanmari Shuttlers Club (CSC) tana khel H. Lalrinhlui chuan women’s singles inelna huangah champion thei naupang ber record a siam.
Champhai Vengthlang mi Zoramthari Renthlei, CSC tana khel tho chu women’s doubles-ah champion-in, MBA Official Championship leh ranking tournament-a category hrang hranga champion thei naupang ber a ni.
He’ng bakah hian record thar hrang hrang siam a ni a; inelna ngaihhlut hlawh ber leh pawisa fai tamna ber men’s singles-ah Saitluangpuia Sailo, Ramhlun Venglai, Sihphir Badminton Club tana khel chu a vawihnihna’n champion a rawn ni leh thei bawk.
Ngaihhlut hlawh tournament
Kar hnih awh Mizoram level-a badminton inelna lian ber leh ropui ber hian ngaihhlut a hlawh hle a; junior category lamah player 215 zetin tournament an khel a, senior lamah player 97 an inlan thei bawk. Match khelh zawng zawng zat hi 367 teh meuh a ni.
TATA Trusts (NEIDA) leh Mizoram Badminton Association (MBA) thawhhona avanga hmun hrang hrang academy thaa awmte pawh he tournament chhim tur hian an rawn hawkhawm a, Mizoram level badminton tournament-ah chuan a lian ber leh sum sen hnemna ber a ni tel bawk.
A vaiin category 21 awmin, he’ngah hian lawmman la phakte tan pawisa fai, trophy leh certificate pek an ni a; junior category bikah semi-final lut chinte tan lawmman pawisa fai siam niin, senior inelnaah phei chuan quarter-final lut chinin an dawng vek a ni.
Record thar neitu Rinhlui leh Thartei
Rinhlui hi kum 15, thla 1 leh ni 12 leka upa a ni a, MBA Official Championship-a champion thei naupang ber nihna lo kawl tawhtu, Abigail Lalthazuali record a rawn khum a ni.
Rinhlui hian final-ah tun tournament-a category pathuma final lut thei awmchhun Ramngaihzuali, Ramhlun South, CSC tan thoa khel chu deciding game-ah 14-21, 21-12, 21-16-in a hneh a, a vawikhatna’n senior official championship lawmman pakhatna a la.
Final-a a hneh tak Zualtei hi kum 17 chiaha upa a la ni a, MBA tournament hrang hranga women’s singles champion thei naupang ber nihna kawl mektu a ni nghe nghe. Nikum hmasa lamah kum 15 leh thla 6 mi nia Siaha Ranking Tournament-ah record a lo siam tawh erawh Rinhlui hian a rawn thaireh tel a ni.
Zoramthari Renthlei ve thung hian women’s doubles-ah Zualtei nena inkawpin Rinhlui leh TC Lalthazualite tangdun chu 21-14, 21-16-in an hneh a, champion thar an ni bawk.
Thartei hian kum 14 a pumhlum chiah a, senior category hrang hranga MBA Official Championship bakah ranking tournament-a champion thei naupang ber record thar a rawn siam bawk a ni. Rinhlui leh Tharteite hi TATA Trusts (NEIDA) leh MBA thawhhonaa PGBA, Hyderabad-a training kalpui mek an ni.A vawihnihna’n Saitluangpuia
Kum 16 leh thla 10 mi niin nikum hmasa khan MBA official championship-a mipa lam inelnaah lawmman pakhatna la thei naupang ber nihna record a rawn siam a, nikum lamah H. Lalthazuala’n a rawn khum leh tawh thung.
Kuminah Saitluangpuia Sailo hun a rawn inherchhuak leh ta a, harsatna lian tham tawk loin men’s singles champion a rawn ni leh thei.
Tluangpuia hian quarter -final-ah deciding game a khel tih loh chu straight set vekin hnehna a chang a, final-ah pawh Laldintluanga Tlau, Bawngkawn BC nen intumin, 21-8, 21-17 hnehna a chang.
Result hrang hrang leh record thar
Badminton tournament-a mipui mit ti tlai ber thintu chu men’s doubles hi a ni awm e. Tun tum final pawh a hmuhnawm hle a, an innawrtawn zak zak hnuah Joseph VL Ringngheta, Mission Veng BC leh C. Lalramzauva, Bawngkawn BC-te tangdun chuan 21-12, 10-21, 21-13-in Lalrinawma leh Laldintluanga Tlau, BBC an hneh, kum zawn in an champion.
Mixed doubles inelna huangah senior player R. Lalbiaksanga, Mizoram Police BC leh Lalduhzuali, Durtlang BC tangdun chuan Vanlalpekhlua Sailo, Chaltlang BC leh Ramngaihzuali, CSC-te tangdun chu 22-20, 21-12-in an hneh bawk. BS-a leh Duhzualite tan official championship-a an vawikhat champion-na a ni a, a lawmawm danglam hle ang.
He championship-ah hian record hrang hrang siam a ni tih tarlan a ni tawh a; MBA official championship khel thei naupang ber record chu kum 12 mi niin K. Lalrempuii leh Lydia Lalnunfeli, Saron BC-te’n an siam a, women’s singles leh doubles category-ah an in lan ve ve.
Kum 56 mi niin, Dr. Malsawmkima (Masky), Mission Veng Badminton Academy chuan official championship khel thei upa ber record thar a siam bawk. Men’s doubles category huangah a fapa nen an inlan a ni.