Mittui nen Messi an thlah liam
Nilaini zing khan Argentina chuan Lionel Messi hova an game hnuhnung ber an khel a, an mikhual Benin chu 3-0 in an hneh. Argentina tan a khelh hnuihnung berah Messi chuan goal khat a thun a, assist vawi hnih a nei bawk. Inkhel a tawp hnuin footballer ropui Lionel Messi chuan inthlahna thu a sawi a, Argentina mipui ten mittui nen an player ropui Messi hi an thlah liam
Inkhel chu
Argentina leh Benin te hi Estadio Más Monumental, Buenos Aires-ah an inhmachhawn a, he inkhel hi ram tan inkhel chawlhsan zui tur Lionel Messi thlah nana ruahman a ni. Khelmual lian takah khat tlata mipui an inhnawh bakah khawvel hmun hrang hrang atangin TV leh Social media lama ngaihven a tam hle bawk.
Argentina tan hian veteran defender Nicolás Otamendi chuan minute 48-naah Messi siamsak atangin hmahruaina goal a thun. Otamendi goal thun hnuin Messi hmunruak luahtu tura an hual Nico Paz chuan a ngaihsan em em Messi siamsak atangin ngeiin minute 61-naah an gioal hnihna a thun zui ve leh bawk.
Assist vawi hnih a neih hnuin changtupa Lionel Messi a inlar a, minute 71-naah penalty pet goal in, an goal thumna a thun. Benin laka a gal thun hi Argentina tan Messi goal hnuhnung ber a ni zui ta nghe nghe. Argentina tan a khelh hnuhnung berah goal khat a thun bakah assist vawi hnih ngawt a nei bawk a, hei hi Messi tan tawp kharna duhawm tak a ni ang.
Inthlahna thu chu
Lionel Messi hian kum 18 mi lek a nih lai, 2005 atangin Argentina senior team tan a khel tan. Benin a hmachhawn thlengin ram tan vawi 208 a khel a, goal 126 a thun. Argentina hi Under 20 World Cup, Olympic, Copa America, Finalissima leh World Cup-ahte a champion pui. Argentina tan khel hnem ber a nih bakah goal thun tam ber a ni tel bawk. Argentina hi champion pui theihna zawng zawngah a champion pui vek a, hmabak nei lovin international football a chawlhsan theih phah.
Benin laka goal a thun bakah assist vawi hnih ngawt a neih hnuin Messi chuan inthlahna thu lungkuai tak a sawi. Inthlahna hu a sawi langsar zual tarlang zui ila:
“ Football ram ropui Argentina kawr ka ha thei hi a ropuiin chhuanawm ka ti hle. Kum 20 chuang zet chu hun harsa leh khirh tak karah pawh hlawhtlinna chan tumin kan lo bei tawh a. Thil tam tak kan tawng a, hlawhtlinna pawh an chang. He ram tan hian ka theihna sang ber ka hlan a, kum 20 chuang zet hun ka lo hman liam ve takah hian lawmthu chauh lo chu sawi tur dang reng reng ka nei lo”.
“He hmunah hian inkhel turin ka lo kal tawh dawn lova, Argentina National Team tana ka khel tawh dawn lo tih hriat hi a na takzet dawn a ni. Duh thlang thei dinhmunah ding ila chuan ka dam chhung zawngin inkianga awm a, Argentina tana khelh reng ka duh. Argentina tana khelh tluka duhawm leh thlakhlelhawm dang reng a awm tlat si lova. World Cup 2026-ah khan ka theihna zawng zawng ka hlan a, theihtawpin ka bei tluan zak naa final kan khelh meuh ka chuan ka chau zova, tih theih ka nei tlem tawh hle. Kha kha chawlh a hun ve ta a ni tih hriatna min pe”.
“World Cup kan chawi a, Copa América, Finalissima te pawh kan la. Argentina team tana ka thil tawn zawng zawngah hian ka lawm takzet a ni. In zavai mai hian ka ngai dawn tak zet che u a, in lamah ka lo tang reng thin dawn a ni. Lawm leh inchuang vah chungin ka kiang dawn ta. Engkimah ka lawm tak zet e”!