Ganja a hluar, a ti thar an tam
Mizoramah heroin leh ganja a hluar a, excise department te’n a inan lohna an sawi dan chu – heroin hi chu Mizoram pawna chhuak tur leh tur a tam a, ganja hi chu Mizoram chhunga mi tur hlang hlak a ni tih a ni.
Mizoram Excise & Narcotics (MEN) department-in Mizorama heroin an manah hian Mizoram chhunga mi tur ni lo, Mizoram pawna mi tur a tam a, a tam zawk hi Mizoram pawna mi tur tia an sawi bakah a hlawm lian tham an man phei hi chu Mizoram pawna mi tur a ni deuh zel an ti. Mizoram hi a tawlh kawng a ni a, chuvangin hmun danga mi turin Mizoram a paltlang thin an ti a, tunlaia heroin hluar pawh hi, Mizoramah a ti thar an pung hluai tihnaah an ngai lo. Ganja erawh chumi letling chiah chu a ni an ti.
Mizorama ganja an man hi hmun danga mi tur a ni lo a, Mizoram chhunga mi tur liau liau a ni an ti. Man tur a pung a, man pawh an man nasa. Mizoramah a ti an pung a, chuvang chuan lakluh pawh a pung tih chu an thlir dan a ni.
|halai, kum lama la naupangte’n an ti thar an ti a, khawvel mi lar, an ngaihsanah ganja leh hetiang chi zu hi an awm a, chutiang atanga intihhmuh chu nia an hriat thu an sawi.
Ganja hi zuk khat a tlem a, a kg zawnga buk pawhin kg a tling har. KG 1 hi a tam tham a, kuminah June thla thleng khan kg 418.462 an man tawh. May thla thleng khan kuminah kg 406.719 an man a, kg 406.719 an man khan 2024 hi ganja man tam ber kum a ni der tawh.
Ganja hi a zute hian ganja tiin an sawi lo a, ‘weed’ tiin an sawi thin. MEN department hotute chuan thalaite’n weed tiin an ko duat a, intih tunlai nan an hmang tiin an sawi.
Zirna in atangin MEN department hi an phone chang a awm a, ganja rim a nam thu leh check tura ngenna an dawn chang a awm. High school leh higher secondary school naupang thlengin intihhmuh an awm thu an sawi.
“Nu leh pa hian ganja hluar thu hi kan hre lo a ni mai thei a, kan fate’n pawn lamah an zu thin tih te pawh a hriat loh theih ang. A hluar a, fimkhur a ngai tih hi kan inhrilh a ngai tak zet a ni,” MEN department hotu pakhat chuan a ti.
“Tleirawlte hian ganja hlauhawmna hi an hre lo a, meizial chi khat emaw an ti ni te pawhin a lang a, at thut theihna a ni tih hre lova intih tunlai nana zu te pawh an ni ang,” a ti bawk.