Excise leh Police-in zu zuar 478 an man

Kumin June thla chhung khan The Mizorom Liquor (Prohibition) Act 2019 hnuaiah Excise & Narcotics leh Police chuan zu zuar 478 an man.
Department pahnihin MLP Act 2019 hmanga an thil man zat tihchhuahah June-ah hian Excise-in 451 leh Police-in 27 zu zuar an man a, belhkhawmin 478 an ni. Zu rui Excise-in 54 leh Police-in 39, a vaiin 93 an man bawk.
Rakzu Excise-in litre 4005.31 leh Police-in litre 756.99, a vaiin litre 4762.3 an man a. Zu bilhlai an man hi Excise chauhin a hranin a chhinchhiah a, tin 9911 an man. ‘Burma local’ (BEDC) chu Excise-in litre 331 leh Police-in litre 13, a vaiin litre 344 an man a ni.
A senchi (IMFL) um puitling hi Excise-in um 3535, Police-in um 72, a vaiin um 3607 an man a; a chanve um hi Excise-in um 299, Police-in um 456, a vaiin um 755; a ‘quar’ um Excise-in um 443 leh Police-in um 1104, a vaiin um 1547 an man.
Heng bakah hian beer (bottle chi) leh canned beer, foreign zu, foreign beer, wine leh tualchhunga siam thei tum ruih theih chi tam tham vak lo man an nei bawk.