India-in ‘Yuddha‘ ni lovin ‘Buddha‘ pe ti

Prime Minister Narendra Modi chuan India-in khawvel hnenah ‘Yuddha’ (indona) ni lovin ‘Buddha’ a pe tia sawiin chumi awmzia chu remna leh hnianghnarna zawk hlir pein India chu kum za bi 21 naah a chak tial tial dawn a ni a ti.
Vienna a tlawhnaa Indian diaspora te hnena thusawina a neihah PM Modi chuan India chuan a tha ber, bright ber nih tumin leh a lian ber leh mellung sang ber thlen tumin hma a la mek a ti bawk a.
“Kum sang tam tak kan hriatna leh thiamna te kan share tawh a. Indona kan pe lo va ‘Buddha zawk kan pe a ni. India chuan remna leh hnianghnarna hlir pe in chuvangin kum za bi 21-ah chak zawkin kan kal zel ang’” tiin PM Modi chuan a sawi a. PM Modi hian Moscow atangin Vienna thlawk lutin Ukraine indona a remna a awm theih nan Russian President Vladimir Putin nena sawi dunna an neih thu a sawi bawk.
Austria a tlawh chu ‘awmze nei’ tia sawiin PM Modi chuan kum 41 hnuah Indian Prime Minister-in a tlawh lehna a ni. “Hun rei tak nghah tawh chu tihhlawhtlinin a awm a. India leh Austria te chuan kum 75 inthianthatna an lawm a ni” tiin a sawi bawk.
“Geographically chuan India leh Austria awmna chu a inang lo hle a, mahse inanna tam tak kan nei a ni. Democracy-in ram pahnih a thlunzawm a. Kan shared values te chu liberty, equality, pluralism leh rule of law zahna a ni. Kan society te chu multicultural leh multilingual a ni a. Ram pahnih te chuan diversity pawmin chu chu kan inthlanna neihah chung values te chu lailanin a awm thin,” tiin a sawi bawk.
Tun hnaia Lok Sabha inthlan neih fel tak chungchang pawh sawiin PM Modi chuan inthlan lian tham takah mi 650 million-in vote thlakin election result te chu hun rei lo te hnua puan nghal a ni a ti a.
“Kan electoral machinery leh democracy thiltitheihna lantirna a ni” tiin a sawi bawk a, mipuite chuan term thum a chelh leh theih nan hun an pe a ni a ti bawk.
Prime Minister Modi chuan tun hnai kum sawm chhunga a sorkarin danglamna a siam te sawi lang bawkin India chu hun rei lo te hnuah khawvel ram economy lian ber pathumna niin kum 2047-ah chuan Viksit Bharat a thleng ang a ti bawk.
“India economy chu 8% in a thang mek a. Tunah hian khawvel economy lian pangana kan ni mek a, rei lo te hnuah 3-na kan ni ang. Kan mipuite hnenah India chu khawvela economy lian top 3 ah ka hlangkai ang tiin ka tiam a ni. Chumi thleng tur chuan kan thawk a ni mai lo, kan tum chu 2047 a ni” tia sawiin kum 2047 a India in kum 100 a lawm rualin developed nation a ni ang a ti bawk.
PM Modi chuan Kum za tam tak Austria ah Indian philosophy, languages leh thought ngaihvenna thuk tak a awm a ti bawk a. “Kum 200 vel kalta khan Vienna university-ah Sanskrit zirtir a ni a. Kum 1880 khan Indology independent chair din hmangin nasa zawka kalpui a ni bawk a. Eminent Indologist thenkhatte tena inhmuhna kan neihah an sawihona atangin India an ngaihven hle tih a hriat a ni,” tiin PM Modi chuan a sawi bawk.
Austria-ah hian Indians 31,000 vel an cheng mek a. Indian diaspora te hi professional health-care leh sector hrang hrang multilateral UN body a thawk te niin Austria ah hian Indian studentds 400 vel an awm mek bawk.
Prime Minister Narendra Modi hian nimin khan India a lo let leh tawh bawk.