Euro & Copa America 2024: Hmawrbawk lunglen kan sep e – Jipson S. Hrangate, AFC Referee

Euro & Copa America 2024:
Hmawrbawk lunglen kan sep e
Khawvel mipuite’n ennawm kan tih em em European Championship leh Copa America Football Tournament ropuite chu thla khat lai khelh a nih hnuin nizan leh tukin zing khan a hmawr an bawk fel ta a, result tarlan hman a nih loh avangin duh hawi zawng zawngin lunglenna kan han hawl kual rih lawk dawn a ni!
Nizan zanlai pelh dar 12:30 khan Euro final match chu Spain leh England-in mipui mipui 78,000 zet thut theihna Berlin khawpuia Olympic Stadium ropui takah an khel a, chu mi hmain closing ceremony ropui tak thlir tur ruahman a ni bawk.
Berlin Olympic Stadium hi kum 1936 daih tawha German-hoin Olympic an thlen tur denchhena an sak kha a ni tawh a, vawiin thleng hian he rama an stadium chhuanvawr leh hmantangkai ngun ber a la ni a, an ramin inkhel lian – World Cup, Euro leh Olympics-te an thlen apianga an hman lar ber a ni zui zel.
European Championship
Tun tum Euro-a final match khel tura kan lo rinlawk (predict) Spain vs Netherlands chu a thleng dik ta lo phawt a! England hoin 90+1 mins-ah dawt min sawitir ta tlat mai!
Semi-final hnuhnung zawka Netherlands leh England inkhelah khan minute 90 thlenga an la inhnehtawk cheu hnuah match fourth official pawhin extra-time an khelh tho tho ringin minute hnih chauh an belh ta kha ni turah ngai ila; vanneihthlaktakin, hun pekbelh minute khatnaah substitute player jersey number 19 Watkins chuan 2-1-a England chakna goal ni zui ta chu Netherlands goal-ah a chhuihlut a, England tan kum zawna Euro final an khelhna tur a hringchhuak ta a nih kha.
England-ho hian engemawti tak hian hun tawp lama dauna(vanneihna) riau an nei thin. 1966 World Cup-a West Germany nen final an khelh tum pawh khan extra-time chhungin goal hnih lai an thun a nih kha, hun tawp dawn tepah! Tin, tun tum Euro-ah pawh khan knock-out stages round of 16, quarter-final leh semi-final thlengin hun tawp dawn an hmangthiam a, a tawp dawn tepah hnehna goal an thun vek hlawm. (vs Slovalkia, vs Switzerland, vs Netherlands)
Nizan result hre hman lo mah se ila he thu i chhiar lai hi chuan Euro 2024 champion an nih hman ngei tawh a rinawm ta tlats! Euro trophy an lak vawikhatna atan mipuiin duhsakna pawh kan hlan niin a lang!
Spain-ho hian World Cup trophy vawikhat (2010) hawn tawhin, Euro trophy chu vawithum lai an la tawh thung – 1964, 2008, 2012 kumte khan.
Tun tuma mi hi an la leh a nih chuan khawvela Euro record an break dawn avangin nizan khan tan an la nasa khawp tura ngaih a ni a, English-ho hlahthlem chu an tum hauh lo ang maw le!
Euro trophy vawithum chawi ve tawh dang chu Germany niin, kum 1972, 1980 leh 1996 khan an champion a ni.
Final khel team pahnih Spain leh England kha nizan tiam lohin international match-a vawi 27 an intawn tawhah Spain vawi 10 an chak a, England hi vawi 14 an chak thung a, vawithum an inhnehtawk. Euro 1968 & 1996-ah khan England hian Spain hi an hneh a, 1982 World-Cup ah an in draw a, kum 6 liamtaa an khelh hnuhnun ber Seville khawpuiah khan England-in mualneitu Spain hi an hneh bawk.
Tun tum Euro-a thil mak ve angreng chu goal thun hmasa sa an chak lo zawk ziah kha a ni!
Tin, semi-final lamah goal scoreline hi 2-1 ve ve a ni a, hei pawh hi goal thun hmasate a chak lo zawkah an tang ve ve a, straight win ve ve an ni bawk.
Copa America
South American Football giants-te inbeihna tournament ropui Copa America pawh tukin zing mai khan a hmawr an bawk fel ta a, nizan Euro final ang bawkin Copa final match tura kan ‘predict’ Argentina vs Uruguay lah chu Colombian hoin an rawn chhukeh leh ta tlat mai!
Uruguay chuan quarter-final match-ah player pakhata kim lo chungin football ram ropui Brazil an hneh a, mahse, semi-final lamah hun chanve chhung zet player 10-a khel Colombia an hneh leh lawi si lo!
Semi-final pahnihna Uruguay vs Colombia kha a boruak a sosang hle. Colombia player Daniel Munoz-a’n Uruguay player chu a kiu-in a nghawk (elbow-strike) vangin red-card a hmu. Match tawpah khan Colombia fans lamin Uruguay player-te leh an chhung leh thianthate an rikrap avangin inbakkaihna a chhuak chiam mai a, security-ho paw’n an thelh hlei thei lo a ni deuh ber!
Mi ramah an zu inkhel a, insualbuaina an zu siam hi a mawi lo hle a, a zahthlak khawp mai.
Comment on referee
Tun tum Copa America chu referee-ho rin aiin an fimkhur lo hle a, thil tihsual an nei zeuh zeuh mai.
Argentina vs Canada semi-final khelhah khan De Paul(Argentina) chu Canada player Ismail Fonte’n a kalh thlu a, referee-in foul pein ball a titawp a, De Paul ground-a mu lai chu Ismail chuan ball (deadball) hmangin na takin a petper pawp mai a, referee-in red card a pe chuang lo khan sawisel a hlawh hle mai!
Hetiang offence hi direct red card pek ngei tur a ni a; Zidane-a’n kum 2006 World Cup final-a Italian player Materazzi a headbutt leh Suarez-a’n kum 2014 World Cup-a ball a lo ben vawr nawlhte nen khan thuhmun reng an ni.
Tin, Colombia player tlu reng chu minute li vel dawn lai referee-in a bengkhawn loh avangin an captain James Rodriguez-a’n a va complain avanga yellow card a hmuh phah ngawtte kha titi lian pakhat a tling.
Hetiang hi ‘Law of 6 seconds’ a ni a; player hliam mu, keeper ball ken chhung, free-kick tinzawn chhung, throw in tinchhung etc. tih angte hi second ruk aia rei a ni tur a ni lo a, chu mi a pelh chuan referee-in free-kick emaw yellow card leh warning emawte hmangin ‘action’ a la hngal tur a ni.
Tukin zing Copa America final match kha zingkar dar 5:30-ah Hard Rock Stadium, USA-ah ropui taka khelh a ni a, Argentina leh Colombia inkhelah chak zawk tarlan hman a ni ta lo.
Argentina kutah hian vawi 15 ngawt Copa America trophy a lut tawh a, Colombia hian kum 2001 khan vawikhat a lo la ve tawh a ni.
Tun tum Copa America-ah hian Colombia hi an attack a na viau mai a, huphurhawm angreng hle mah se champion tura kan ‘predict’ chu Argentina tih kha a ni tlang tho tho e aw!