Hnawlin hydel project tibuai rih lo

Tunhnaia ruahsur nasa in Tuirial lamah hnawl engemawzat a len thla mek a, hetiang hnawl hian Tuirial Hydro Electric Project erawh a tibuai lem lo thin tih sawi a ni.
Luia bawlhhlawh leh thildang chi hrang hrang, tui tam laia a len thin chu a kum telin a tam tial tial a. Heng zingah hian plastic um ruak pawh a tam thin hle a, thing/ mau leh hnawmhnawk dang a tel thin bawk nia thu dawn a ni.
The Aizawl Post-in a zawhchiannaah heng hnawl hian Tuirial HEP tak hi chu a tibuai hran loa, tun tuma hnawl chhuk mek pawh hian a tuikhuah chin hi a la thleng thla lo a, thleng thla pawh nise, an lo dang tha viau thin tih an sawi. Vawi hnih khat erawh thing tam lutuk vangin split gates velah an buai ve tawh a, chumi tih loh chu an lo dang tha viau zel tih an sawi a ni.
Tuirial HEP hian tha takin kawlphetha a siamchhuak mek zel a, tunah hian unit I leh II chu tha takin a kal tih sawi a ni bawk. Hetihlai hian Tuirial luia hnawl tam lutuk hian a bulhnaia khaw thenkhat erawh luia eizawng an tam avangin an eizawnna a nghawng hle tih sawi a ni.