Darlak leh Tuidam kawnga harsatna MJA-in SP sawipui

MJA Mamit District leh Superitendent of Police Mamit District chuan Darlak leh Tuidam inkar kawng harsatna sawiin Ningani khan an inkawm.
Darlak leh Tuidam inkar kawng chhiat vanga mihring leh lirthei himna tura lirthei tlan dan ruahmanna siam, kumin July 1-a thupek chhuah chuan zawm a hlawh tawk lo nia an hriat thu MJA hian an sawi a. Thupek zawm ngei theih nana hmalak dan tur an sawiho.
Tuna lirthei kal dan tur ruahmanna siam – zing dar 5.00 atang chawhnu dar 2.00 thleng Tuidam atanga Darlak pana kal tur leh, chawhnu dar 3.00 atanga zing dar 4.00 thleng Darlak atanga Tuidam pan tura thuchhuah chuan zawm a hlawh loin, kawng lakah harsatna a thlen nasa hle a. Hei hi tih ziaawm a nih theih nan duty detailment siam turin Mamit SP hi an ngen a ni.
Mamit SP Lalthangpuii Pulamte chuan he harsatna hi an lo hriat thu leh July 18 zing dar 5.00 atanga duty an dah thu a lo hrilh a. Tuna an kawng hawn hian awmzia a nei tam lo a nih chuan ruahmanna dang siam leh theih a ni, tiin, thurawn inpek tawn zel nise an ti a. A tul anih chuan one way-a kaltir a tul maithei tih sawi a ni.
He kawng hi Langkaih balu phurhna kawng ber a nih vangin fimkhur a ngai a. Thupek chhuah hian duty awm loh vanga zawm a hlawh lo thin chuan khualzin tan harsatna a thlen nasa hle tih Mamit MJA hian an sawi a ni.