Khawpui inrelbawlnaah HC inrawlh ngai hi…

Leimin avanga Bawngkawn leh Durtlang Leitan inkar kawngpui ping thin chuan Aizawl mipuitebakah Mizoram pum huap harsatna a thlen a. Heng lei min thin hi kawng ko lama construction hrang hrang atana lei laihin a nghawng a nih avangin, Gauhati High Court, Aizawl Bench chuan mipui tawrhna a thlen zel loh nan tiin helaia hna kal lai chu suo moto hmangin a titawp a, a vil zui turin sawrkara thuneitu hrang hrangte thu a pe nghal a.
Ram inrelbawlna khawih thilah high court-in inrawlh tul a tih tawh chuan, ‘a tul hle’ emaw ‘a tuah hle’ emaw tihna a ni awm e.
Court lam chuan state sawrkar emaw khawpui enkawltu AMC emaw chu helai vela harsatna thleng thin sukianna tura hmalakna nei tha tawk lo tiin hetiang hian order a siam ta a ni a, a mawhphurtu lam tan chuan a tlawmthlakin a mualphothlak hle, a tih theih bawk ang.
Tun tuma helai vela harsatna thleng mek chungchangah hian, hnam rothil humhalhtu pawl Indian National Trust for Art and Culture Heritage (INTACH), Mizoram Chapter chuan, helai vel thil thlen dan leh hei hian nghawng tha lo tak tak a hrinchhuah theih dan chu Gauhati High Court hnenah hian an thlen a. He pawl hian helai Bawngkawn leh Durtlang inkar hi Aizawl khawpuiin Natural Heritage a neih that ber tiin a humhalh dan an ngaihtuah ngar ngar a, sawrkara thuneitute pawh an dawr thin a, AMC pian hma, Aizawl Development Authority hun lai atang tawha hmalakna a ni. Khatih lai kha chuan helai chhoah hian chenna in a la awm meuh lo. Sawrkar thuneitu lam hian Natural Heritage pawimawhna an varpawh lo hle a nih a rinawm a, Chanmari leh Chaltlang inkar kawngpui dung, khawthlirna nuam em em pawh hi tunah chuan chenna in a intlar khat leh tep tawh a ni.
Aizawl khawpui hi Planned City a ni lo kan tih rual hian, tam tak hi chu tlaikhawhnu deuh pawh ni se, a nalh tur lam ni lo, a him tur zawng pawha la Plan theih a ni; mahse, chu chu kan thengthawngah a lut lo tlang a ni ang, kan inlai balin kan inlai chim rem rum a, tuiluankawr mumal loh avangin tuihawkin min hawrh leu kual vel mai mai a. Tunah lah, awihpang bakbahaiah a inlai chim zawngin ‘development’ kan ti a, kan la inthlir liam vel mai mai em maw ni? Court lam inrawlh a ngai ta hial a!
Chhiatnain min nanchin hma chu harh kan tum lo em maw ni tihturin kan khawsak phung hi a awm leh tlat thin.