Dan loa Forest rama kut thlak an dem

Environment, Forests & Climate Change department chuan Forest Training School Bethlehem Vengthlanga rama Tennis Court leh gate tihchhiat a ni chu an demin, tun hnu ah thleng tawh lo se an duh tih an sawi.
EF&CC department thuchhuah danin, kumin July 5 khan Bethlehem Vengthlang YMA Branch president leh Local Council chairman chuan Forest Training School (FTS) principal hnenah ziakin, FTS chhunga Tennis Court paltlanga kawng awmsa tih zauh deuh a, laihtlang an tum thu sawiin, an hmalaknaah harsatna siam lo turin an hriattir a. Principal hian FTS compound chhungah kut thlak phal a nih loh thu leh, phalna nei hmasa lo chuan kut thlak lo tura hriattirin, an thil duh chu dan anga kalpui a nih theih nan, an sawi anga ruahmanna awmsa a lo awm a nih chuan a rang lama thehlut turin July 11 khan a chhang a, he lehkha hi LC chairman leh YMA president pek an ni.
July 22-ah FTS principal hian lehkha tichhuak lehin, Bethlehem Vengthlang LC chairman leh YMA president chu mahni thua kut thlak lo tur leh, FTS Complex-ah phalna nei loa kut thlak a nih chuan dan anga kalpui a nih tur thu a hriattir nawn a. Khawtlang tana ram mamawh a awm a nih chuan dan anga kalpui a nih theih nan an lehkha neih sa, ruahmanna awm sate thehlut turin a hriattir a. Mahse, principal hriattirna hi ngaipawimawh loin July 23 zingah gate leh Tennis Court fencing tichhiain, kawng laih a ni tih a sawi.
Dan loa sawkar hmunhma pawimawh tichhe zawnga hmalakna chu Forest department chuan pawi a tiin a dem hle tih a sawi a. Helaia kawngpui sial chungchang hi uluk taka sawrkarin a ngaituah lai mek, mipuiin an mamawh dan leh FTS ram neih dan zirchian lai mek a ni, tiin, ‘Hetihlaia thuneitu sawrkar rawn hmasa loa thil tichhe zawnga sawrkar ram chhunga chet lak hi khua leh tui tha tih dan turah Forest department chuan a ngai loa, thleng nawn tawh lo se a duh takzet a ni,’ a ti.