Kuhva huan neitute’n a leitu tur nghak ve tawp

Hachhek tlang dunga kuhva huan neitute’n dawrtu an la nei lo a, an kuhva leitu tur hi an nghak ve tawp. ‘Tihngaihna kan hre lo a, tihian kan nghak ve tawp mai,’ an ti.
Kuhva hi a par tawh a, a rah tawh. Kum dangah chuan tun ang hunah hian a leitu tur ‘mazon’-te’n an hauh fel tawh thin a, kumin erawh mazon hi an la lang lo. A tlai tawh a, mazon lan hun hi an nghak ve tawp mai tih chu kuhva huan neitute sawi dan a ni.
Kuhva huan neite sawi danin, May velah kuhva hi a par tan a, mazon te’n a hmunah enin an hauh thin. May leh June velah hi chuan an hauh fel a, sum pawh huan neitute’n an dawng lawk thin. An sum dawn lawk hi an ei ber pakhat a tling a, chuvangin kuminah mazon an la lang lo hi, huan neitute’n sum an la dawng lo tihna a ni tel a, chhungkaw engemaw zat khawsak a nghawng tawh.
“Mazon rawn lan hi a hun daih tawh a, an rawn lan hun hi kan nghak ve tawp mai. Pahnih khat chu khaw thenkhatah chuan an rawn lang tawh,” Hachhek Bial Kuhva Chingtu Pawl general secretary Lalvenhima Ralte chuan a ti.
“An rawn lang har hian nghawng a nei thei a, tunah pawh ‘advance’-a sum kan dawn thin kha kan la dawng lo a. Chu bakah hetia kan manganna remchanga chuh hian a man min nawr hniam an tum dawn a, tunah pawh an tum tawh a,” a ti bawk.
Foreign kuhva an puh ber a, foreign kuhva vang hian an kuhva thar hralhnaah harsatna an tawkah an ngai. Hei vang hian Hachhek tlang dungah foreign kuhva tawlh lo dang turin June ni 5 atang khan chhun zan zawmin an duty mek – July ni 25 kha a ni 50-na a ni.
Hachhek Bial Kuhva Chingtu Pawl hruaitute chuan foreign kuhva phur lirthei, a ruka kal hi a awm rengin an hria a, lirthei zawng zawng an dap sen loh thu leh tlem te tea phur an awm reng nia an hriat thu te an sawi. Dapchhuah police check gate-ah hian uluk takin lo dap se, Hachhek leh West Phaileng lama kal tur an dang vek thei a, check gate ber pawh an paltlang theih avangin tlawmngaia duty-te tan lo dan sen a ni lo an ti.
Hachhek tlang dung hi kuhva chinna hmunpui a ni mek a, a hma chuan an kuhva leitute hian Kanhmun paltlangin Karimganj lamah an phur chhuak thin. Kum li vel liam ta atang khan Bairabi kaltlangin Hailakandi district lamah phur chhuah a ni tawh. He kawng hi a kual zawk a, hei pawh hi foreign kuhva vang leh Karimganj lama an politician-te’n chumi remchang chuha harsatna an lo siam vangah an ngai.
Kum liam taah khan Hachhek Bial Kuhva Chingtu Pawl chuan kuhva hi metric ton 7520.95 an tharah an ngai a, hei hi Rs 376,047,650 man a ni tiin an chhut.
Thu dawn danin, July ni 24 zanlaiah khan Zamuang leh Zawlnuam inkarah foreign kuhva phurtu lirthei pakhat chu mi tu tih hriat lohte’n an tichhia. Hei hi Bairabi police check gate paltlang a ni.