2nd round-ah Djokovic vs Nadal kan hmu thei dawn!

Paris Olympic Games mipa tennis singles inelnaah top seed Novak Djokovic leh record siama French Open champion tum 14 ni thei awmchhun Rafael Nadal-te chu second round-a intum thei turin Ningani draw-ah pawh a ni a, first round an paltlang ve ve a nih chuan Olympic men’s singles final tluka ngaihven hlawh inkhel kan hmu hma hle dawn niin a lang.
Serbia tana gold medal beiseina lian pakhat Djokovic hian a career-a title hraw a la sualchhuah ve loh awmchhun Olympic gold medal a beiseina kawngah Paris tlak lei sen chunga chungnung lawr lak Spaniard a hmachhawn hma theih dawn avangin gold a beiseina a derthawng lo thei lo a, Nadal hi a paltlang thei a nih pawhin Spain sahuai ser tur dang Carlos Alcaraz chu second seed ni chungin a la awm cheu dawn bawk a, Serb tan Olympic gold hi awlsam taka sualchhuah mi ni dawnin a lang lo!
Italy aiawh tur Jannik Sinner inhnuhdawh leh tak avang khan Djokovic hian number one seed a luah chho a, first round-ah Australia player Matthew Ebden a hmachhawn dawn a, opening round danga Nadal-a’n Hungary aiawh Marton Fucsovics a hneh ve bawk chuan tennis palian pahnih hi second round-ah an insu thei dawn a ni.
Djokovic leh Nadal hi French Open bikah vawi 10 intum tawhin, chu’ng zinga pathum chu final match niin, Nadal a chak fai vek a; Spaniard hi hliamin a bawhbeh tak reng avangin tlahniam deuh tawh mah se Paris clay-ah na na na hi chuan Serb tan player lian la ni reng tura ngaih a ni!
Tunthla maia Wimbledon kaltlanga a Grand Slam title palina hlawhchhuak hlimhlawt Alcaraz chuan first round-ah Lebanon player Hady Habib a hmachhawn ve thung ang.
Nadal leh Alcaraz inkawp tur chu doubles bikah seeded ni pha lo mah se men’s doubles lama Spanish dream team an ni tho a, first round-a an tum tur Argentine pair Maximo Gonzales leh Andres Molteni-te tan chuan tum chakawm zawk zawk an ni lo mai thei!
Defending men’s singles champion Alexander Zverev chuan seeded three ni chungin Spain aiawh Jaume Munar lakah bul a tan dawn.
Ningani women’s singles draw-ah top seed Iga Swiatek of Poland chuan Romania nula Irina-Camelia Begu lakah bul a tan dawn a; second seed Coco Gauff chuan Australia player Ajla Tomljanovic a hmachhawn hmasaber ve thung ang.
First round match danga four-time major winner Naomi Osaka of Japan leh Grand Slam title chi hrang thiau pathum la ve tawh Angelique Kerber of Germany insu tur pawh hi hmeichhe singles first round-a mite ngaihven hlawh inkhel tur a ni.
Rio Olympic silver medallist ni bawk Kerber hian Ningani khan a hmalam awm dan tur a puang a, Paris Games zawh hian tennis inelna chawlhsan ve tawh a tum tih a nemnghet.
World number one hlui Kerber hi tunah kum 36 mi ni ve tawhin, Rio 2016 final-ah khan Puerto Rican Monica Puig hneh loin a tlawm a, kkha mi kum vek khan Australian Open leh US Open title a sualchhuak thung.
German veikhawr Kerber hi kum 2018 khan Wimbledon-ah champion bawkin, Roland Garros lei senah hian quarter-final vawihnih a thleng ve tawh bawk a, kumin hian Brazil ram Olympic final-a a tlawmna chhanglet turin a tum a ruh thawkhat tura ngaih a ni!
India top singles player Sumit Nagal chuan Paris Olympics campaign bul a tanna turah kumin April thla maia a hneh hnu French Moutet Corentin a tum dawn a, a hneh nawn leh a nih chuan world number six lai lo ni ve tawh Australian Alex di Minaur nen second round-ah an insu thei dawn.
World ranking-a 80-na luah mek Nagal leh ATP singles chart-a amah aia pen 12-a sang zawk Moutet-te head-to-head record hi 2-2 niin, Nagal tan tuntum hian chona lian a tling leh dawn a, April thla anga a chak leh hlauh a nih chuan Wimbledon quarter-finalist Di Minaur lakah fiahna lian zawk a hmachhawn zui thei dawn a ni.
Di Minaur hi khel bawr na avangin kumin Wimbledon last-eight match pakhatah khan Novak Djokovic hmachhawn thei lo zawngin a inhnukdawk a, Paris-ah hian a fitness-in ngai a awh tawh em kan thlir ang.
Men’s doubles lama Indian pair inlan tur Rohan Bopanna leh N. Sriram Balaji inkawp chuan French pair Fabien Reboul leh Edouard Roger-Vasselin lakah bul an tan thung dawn a; Bopanna leh Roger-Vasselin hi ATP Tour lamah an lo tangdun tawh nghe nghe a ni.
Tun hi ATP mipa doubles ranking-a world number one upa ber ni thei Bopanna tana Olympic medal beiseina hnuhnungber a ni tawh dawn a; 2016 Rio Games-ah khan Sania Mirza nen inkawpin mixed doubles event-ah bronze medal awrh pha lo tawk chiahin palina an ni a, tun hi tennis inelna a chawlhsan hmaa Olympic a khelh tawpna ber tur a ni ve tawh.
Paris Olympics tennis tournament hi vawiin, July ni 27 atanga August ni 4 chhungin Roland Garros-a khelh tur a ni.