Cyclone tuar naupang ho hnenah chhawmdawlna pe

Women & Child Development (WCD) hnuaia scheme pahnih, Mission Vatsalya leh Mission Shakti kaltlangin kumin May 28-a Cyclone Remal vanga Mizoram hmun hrang hranga vanduaina leh harsatna tawk zinga naupangte hnena chhawmdawlna ruahman chu Thawhtanni khan hlan a ni a. Women & Child Development minister Lalrinpuii chuan a tuartu naupangte hnenah a hlan.
Cyclone avanga mi tam takin an in leh lo bakah nunna hial an chan leh chhungkaw thenkhat relief camp-a an awm a ngaih phah chu pawi a tih thu minister hian a sawi a. Khuarel chhiatna tuartu naupangte chu ‘The Juvenile Justice (Care and Protection of Children) Act 2015 chuan a bika enkawl leh venhim ngai a tihte zing ami an nih avangin ngaihpawimawh an ni tih a sawi.
Cyclone vang hian chhawmdawl ngai naupang 96 chhinchhiah an ni a. Women & Child Development department hmalakna in a tum khatnaah naupang 41-in tanpuina an dawng a ni.
Chhawmdawlna pekte chu zirchian leh finfiah vek an nih bakah mamawh hmasa zual ngawih ngawiha ngaihte an ni tih Lalrinpuii hian a sawi a. La dawng ve lo te pawhin an dawn zel theih nan kawng hrang hrang dapin hma lak zel an tum tih a sawi.
District Child Protection Unit Aizawl leh Child Welfare Committee Aizawl chuan kumin May 31 atanga July 5 chhung khan Aizawl leh a chhehvel hmun hrang hranga Cyclone Remal-in chhiatna a thlen tuartu naupangte zirchiangin an finfiah a. He chhiatna thlengin a nghawng zingah hian naupang 96 an tel.
Chhawmdawlna programme-ah hian Mission Shakti hnuaia Beti Bachao, Beti Padhao (BBBP) atangin hmeichhe naupang 28 chu SSA account hawnsak an ni a. Naupangten ei leh in tur tha an neihna atan, an lehkha zirna puitu tur leh hriselna tha an neih theihna atana an inenkawlna hi Mission Vatsalya hnuaiah Juvenile Justice Fund atangin naupang 16, kum khat chhung thlatin Rs. 2000 theuhin suma chhawmdawlna pek an ni. Heng bakah hian naupangte hi gift package pek niin, mi inphalten stationery item an pe bawk.