Kawngpui siam hna uluk turin CM adviser-in NHIDCL a hrilh

Adviser to chief minister (Technical) Er. Ginzalala chuan Thawhtanni khan a pisa-ah NHIDCL hotute kawmin National Highway 306 leh NH 6-in a paltlang Vairengte leh Kolasib inkara 4-lane kawngpui siam chungchang a sawipui.
Adviser chu CM chuan he kawng siam hna chak zawka thawk turin NHIDCL chu a duh tih a sawi a. NHIDCL lamin forest clearance leh harsatna dang an tawh an sawi chu sutkian pui turin theihtawp a chhuah dawn tih a hrilh bawk.
NHIDCL chu kawngpui siama hmasawnna hna an thawhnaah environment dim sak hle tura a duh thu sawiin, a remchang lai laia leivung paih liam mai loin, a theih chin chinah mumal takin soil bank siam a tul tih a sawi a. Chutianga hma lak dan tur chu a sawipui. Soil bank siam hi leivung paihna mai ni loin, a hnu zelah mipui tana tangkai siam zui nan, truck chawlhna atan, kawngpui kual lutuk tur pawhngil nan leh tangkaina dang tam tak a neih zui theih thu NHIDCL hotute hi a hrilh a, chutianga hma la tur chuan a chah.
Heng bakah hian thingtlang lama kawngpui sialnaah, a paltlang khua te chu hun lo kal zel tura an khaw zauh leh changkanna dang kengtel thei kawng zawnpui thiam a tul tih Er. Ginzalala hian a sawi a. Hetianga hma la tur hian sawrkar chuan a beisei tih a hrilh.
India leh Myanmar ramri hrula kawngpui pawimawh tak kal tur pawh chak zawka hma la a, hna tan thuai turin a chah a. NHIDCL hotute chuan adviser to CM thurawn chu tha an tih thu leh zawm ngei an tum tur thu an sawi bakah NH 06 leh 306-a harsatna an tawhte sutkian kawnga hma lakpui a tum avangin an lawmthu an hrilh a ni.