Billboard 200-ah Stray Kids leh Jimin No.1 leh No.2-ah an debut

On Jul 30, 2024 20 0

K-pop-in rimawi khawvelah hmun a chang sang telh telh a, US-a album chart, Billboard 200 chart-ah a rualin No.1 leh No.2 an ni thei ta tlat mai. K-pop group Stray Kids album thar ‘ATE’ chu No.1 niin, leh BTS member Jimin solo album ‘MUSE’ chu No.2-ah a debut bawk a, hei hi Billboard 200 chart record niin, he chart-a K-pop album No.1 leh No.2-ah a ruala a awm vawi khatna a ni. Hetihrual hian ‘Twisters: The Album’ pawh No.7-ah a debut a, kumina soundtrack album he chart-a debut sang thei ber a la ni.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Stray Kids album ‘ATE’ hi kar khat chhungin 2,32,000 hralhin No.1-ah a debut a, chung zinga 2,18,000 chu album tak tak hralhna niin, streaming atangin 13,000 (on-demand streams maktaduai 19.05) niin, album-a hla mal hralhna atangin 1,000 a tling thei bawk.
‘ATE’ hi Stray Kids tan an album he chart-a No.1 a debut thei pangana a ni tawh a, an album panga te hi a zawnin zatin No.1-ah an la debut vek a, 2022-ah an album pahnih ODDINARY leh MAXIDENT te No.1-ah an debut ve ve a, 2023-ah album pahnih bawk ROCK-STAR leh 5-STAR te No.1-ah an debut pui leh ve ve bawk a, chart record siamin, group zinga album hmasa ber atanga he chart-a album pangana thlenga No.1-a debut vek thei awm chhun an la ni. Hetiang tithei zaithiam dang chu DMX chiah a la awm a, ani hian 1998 leh 2003 inkarah a album hmasa panga te No.1-ah a debut pui vek thei a ni.
ATE hi Korean hla deuh vek a ni a, sap hla ni lo deuh vek awmna album he chart-a No.1 ni thei 25-na a ni a, kuminah hetiang album he chart-a No.1 thei pahnihna a ni a, March thla khan K-pop group tho TWICE album ‘YOU’ chu No.1 a lo kai tawh bawk a ni. He chart-a sap hla ni lo deuh vek awmna album No.1 kai thei 25 zinga album 16 chu Korean album niin, panga chu Spanish album a ni a, Italian album pakhat awmin, French album pakhat, Spanish, Italian leh French inpawlh album pahnih a awm bawk,
BTS member Jimin solo album ‘MUSE’ chu 96,000 hralhin No.2-ah a debut a, chung zinga 74,000 chu album tak tak hralhna niin, streaming atangin 15,000 leh album-a hla mal hralhna atangin 7,000 a tling thei bawk. ‘MUSE’ hi Jimin solo album pahnihna niin, a album hmasa ‘FACE’ chu No.2 a lo kai pui tawh bawk.
Eminem ‘The Death of Slim Shady (Coupe de Grace)’ chu 79,000 hralh lehin No.1 atangin No.3-a a tawlh a, chart No.1 hlui Taylor Swift ‘The Tortured Poets Department’ chu 74,000 hralh lehin No.4-ah bawk a la awm a, Zach Bryan ‘The Great American Bar Scene’ chu 71,000 hralh lehin No.3 atangin No.5-ah a tawlh a, chart No.1 hlui Morgan Wallen ‘One Thing at a Time’ chu 65,000 hralh lehin No.5 atangin No.6-ah a tawlh bawk.
Album tlangzarh thar ‘Twisters: The Album’ chu 57,000 hralhin No.7-ah a debut a, kumina he chart-a soundtrack album top 10-a lang thei awm chhun a la ni. He country music lam hawi album hi Hollywood movie Twisters companion album a ni a, a film hi kar kalta khan North American box office No.1 te pawh a lo ni ve tawh bawk. He album-ah hian country star Luke Combs, Jelly Roll, Miranda Lambert leh Lainey Wilson te pawhin aw an thawh a, album-a hla 29 zinga hla 20 chu a film-ah hian hman a ni.
Chappell Roan ‘The Rise and Fall of a Midwest Princess’ chu 54,000 hralh lehin No.7 atangin No.8-ah a tawlh a, Billie Eilish ‘Hit Me Hard and Soft’ chu 54,000 tling lo deuh hralh lehin No.6 atangin No.9-ah a tawlh a, Noah Kahan ‘Stick Season’ chu 43,000 hralh lehin No.10-ah bawk a la awm.