Ram pum huap naupang camp-a telte nen inkawm

Mizoram State Council for Child Welfare member-te leh kumin June 24-29 chhunga 39th Learn to Live Together Camp, Chandigarh Punjab a neiha tel Mizo naupang 6 leh anmahni hruaitu mi pahnih chu Thawhlehni khan Social Welfare, Women & Child Development minister Lalrinpuii chuan a kawm.
Learn to Live Together Camp-ah hian state 18 atangin naupang an kalkhawm a. Item hlimawm tak tak leh naupang tana tangkai tur thil hrang hrang entir a ni. Mizoram aiawha kalten item an neih chu lawm a hlawh thu leh a kharna inkhawmah an tih nawntir hial thu anmahni hruaitute hian an sawi a ni.
He Camp hi Indian Council for Child Welfare bultuma neih a ni a. Mizoram State Council for Child Welfare (MSCCW) ah hian larsap chu patron niin Social Welfare minister hi ex-officio chairman a ni. Working president hoin member 30 an awm mek. Kum 2022-a din tan a ni a, tunah hian naupang 12, kum khatah Rs. 5000-in an sponsor mek bakah naupang huaisen 30 vel huaisen lawmman an dawn theih nan buaipuiin hma an lo lakpui tawh a ni.
Kumin camp-ah hian Saihnuni Sailo Memorial School zirlai naupang 6 – hmeichhia 3 leh mipa 3 leh anmahni hruaitu an zirtirtu pahnih an kal a ni.