Tui pawimawh zia inzirtirna bu “Tui Kan Nunna” CYMA ah pe

YMA branch hrang hrang, library nei zawng zawngte library-a dah turin Mizoram Sustainable Development Foundation (MSDF) in “Tui Kan Nunna” tih lehkhabu an chhuah chu Thawhlehni khan Central YMA hruaitute hnenah copy 700 an hlan.
He lehkhabu ah hian Mizorama tui dinhmun chungchanga mithiam hrang hrang thuziak dah a ni a. 2023 March 24 khan Mizorama tui dinhmun zirhoin ‘ Round Table Discussion on Water Security in Mizoram’ chu Mizoram University campus-ah MSDF leh MZU hnuaia Department of Environmental Science leh Department of Biotechnology tangho buatsaiha neih a ni a. Sawrkar department hrang hrang – Public Health Engineering, Agriculture, Environment Forest & Climate Change, Irrigation & Water Resources bakah Central YMA leh hetiang lama hmalatu NGO – BIOCONE, Save Mizoram Rivers, Synod Social Front leh social activist Vanramchhuangi te leh MZU mithiamten paper an present a; heng hi a bua siamin chhuah a ni.
“Tui Kan Nunna” tih hi tui chungchanga inzirtirna pawimawh a nih angin, mi tam zawkin an chhiar theih turin Central YMA hnuaia YMA branch hrang hrang library tinah leh library dang – MZU, Gen Hqrs & District MJA-ah te pek vek an tum a. Hei bakah hian MSDF chuan Doordarshan Kendra Aizawl nen tangdunin hmasawnna tluantling – tui hna, sik leh sa leh environment chungchanga inzirtirna atan thuthlung an ziak a. Tun thla (July) atang hian thlatin hetiang lam hawi inzirtirna hi DDK Aizawl atangin tihchhuah a ni.