ST certificate pek dan sawiho

Rualkhai zawk leh kalphung mumal zawka scheduled tribe certificate pek chhuah dan tur relin district administration hrang hranga nodal officer-te chu adviser to chief minister (Political) Lalmuanpuia Punte hoin Thawhlehni khan an thukhawm.
Mizorama scheduled tribe-te hnena certificate pek danah nakin zela hnam tana pawi thei leh inven ngaihna lai ngaihtuah ho a ni a. Certificate pek chhuahah pawh fimkhur lehzuala kalpui dan tur sawi a ni.
Mizorama scheduled tribe awmten certificate an lak chhuah dawnin, form awmsa zulzuia dik tak leh fel taka ST certificate an neih theihnan leh ST certificate-a hnam dang, ST ni ve lo ten an neih lohnana invenna lam sawi a ni a. District hrang hrang atanga nodal officer kalkhawmte chuan an district huamchhung theuha uluk leh fimkhur taka ST certificate an pek chhuah thu an sawi a. Hmalam hun atana thil tul hrang hrang sawiin, an lo kalpui tawh dante ennawn a ni bawk.