Kuminah Kolasib district-ah naupiang 611 leh mitthi 297

Kumin January atanga June inkar khan Kolasib district-ah nau piang 611 awmin, mitthi 297 an awm a. Nau piang zingah hmeichhia an tam zawk a, mitthi ah mipa an tam zawk thung.
Office of the District Research Officer Kolasib buatsaih Kolasib District Quarterly Statistical Bulletin for April to June 2024 chu Nilaini khan district bawrhsap Robert C Lalhmangaiha’n a tlangzarh a. Report-a a lan danin, 2011 census-a an district-a mihring awm zat chu 83054 a ni a. Kumin January – June inkara naupiang 611 zingah hmeichhia 316 leh mipa 295 an ni. Mithi 297 zingah mipa 189 leh hmeichhia 108 an ni. April, May leh June ah thih na chhan tam ber chu cancer niin, lung thalo leh thin lam natna a tam bawk.
Hemi hun chhung hian Kolasib district-ah ram chhung mi khualzin thahnem tak an neih laiin, ram pawn mi erawh January to April chhunga inziaklut mi 8 an ni.
Bulletin-ah hian Kolasib district-a statistics pawimawh tak tak tarlan a ni a. Registration of Births and Deaths, ruahtui tlak dan data, thil man san chhoh dan leh Mizorama Kolasib district kaltlanga khualzin luh dan chu hlawm hran theuha dah a ni.