Lawngtlai district-ah kum kaltaah nau chunga thi 7
Kum kalta, 2023- 2024 khan Lawngtlai district-ah nau chunga thi nu 7 an awm a; nausen (kum khat hnuailam) thi 10 an awm.
Lawngtlai district-a nau chunga nu thihna leh nausen thi chungchang thlirletin a kaihhnawih sawrkar mi leh pawl aiawhte chu SDO (Sadar) Margaret J. Vanlalremmawii kaihhruaiin Thawhlehni khan Lawngtlaiah an thukhawm a. SDO chuan an district-a nausen, naute leh nu nau pai thihna la awm fo chu thil veiawm tak a ni, tiin, naupang kum khat leh kum nga hnuailam bakah nu naupai lai emaw nau neih vang emawa thihna thleng thin tibo turin theihtawp chhuah tlan a ngai tih a sawi a ni.
District Hospital Lawngtlai hotute report danin, kum 2023 chhung khan Lawngtlai district-a Maternal Mortality Rate (MMR) chu 303 niin, Infant Mortality Rate (IMR) chu 9 a ni. Kum 2023- 2024 khan naupang kum khat hnuailam thi 10, kum nga hnuailam thi 5 leh nau chunga thi 7 an awm a. Kumin April atanga June thleng khan nausen kum khat hnuailam thi 10, naupang kum 5 hnuailam thi 5 leh nu nau chunga thi 1 an awm a, District Hospital-a boral vek an ni lo.