Manipur tlawh turin PM Modi ngiat

Congress’ Outer Manipur MP Alfred Arthur chuan kar kaltaa Finance Minister Nirmala Sitharaman Budget pharh Union budget chu ‘anti-people’ tia sawiin Sitharaman chuan hnam leh chi anga buaina la thlen mek rengna leh tuilianin a tihbuai fo avanga per capita income hniam leh inflation sang si Manipur chu a hrefiah lo a ni, a ti.
Manipur MP chuan Prime Minister Narendra Modi leh Home Minister Amit Shah chu Manipur tlawh tura ngenin eng vangin nge Chief Minister N. Biren Singh chu tun thlenga ban a la nih loh tiin zawhna a siam bawk a. Prime Minister pawh zawhna zawtin ‘State te reuh têah remna i thlen thei lo a nih chuan eng tiangin nge ram pumah remna i thlen kan beisei theih ang’ a ti bawk.
Union Budget 2024-25, Lok Sabha-a sawihona neihnaah Arthur chuan, “House a Finance Minister Nirmala Sitharman Budget pharh hi ka enfiah tawh a. Tun dinhmunah chuan Manipur chu per capita income hniam ber state leh inflation sanna ber a ni tih a hrefiah lo a ni. Engtiangin nge state income nei hniam ber leh thil man sanna ber ni bawk chu a damkhawchhuah theih in beisei le?” tiin a sawi a.
“Finance Minister hian anti-people budget a pharh a ni. Equal Budget kan phu a, chu chu kan right a ni. Min thlangtlingtuten thusawi ngaithla tur chauh emaw figure phuahchawp tak tak he House a sengluh ngaithla mai mai turin min thlang lo” a ti bawk.
Prime Minister leh Home Minister chu chi leh chi hnam leh hnam anga buainain a uap mek Manipur chu tlawha ‘siam tha’ tura ngenin Arthur chuan Manipur mipuite tan justice a ngiat thu a sawi bawk a.
“Prime Minister ngen ka duh, 56-inch awm nei a ni a, Prime Minister chak a ni. Kan khua leh tui ten eitur takngial pawh nei lovin refugee camp ah an awm a. In chief minister ni tina tharum thawhna chungchang sawi reng zawhna zawt rawh u. Hei hi kan ram a ni a, Indian khua leh tui te vek kan ni a. Eng vangin nge Manipur-a inlokal duh loh? Kum 10 chhungin i ‘maan ki Baat’ kan ngaithla tawh a. An chenna in pawha let thei tawh lo hmeichhia leh naupang te tap i ngaithla thei lo em ni?” a ti bawk.
Manipur buaina chu Chief Minister Biren Singh-an a kalpui fuh lo tia sawiin Congress MP chuan, “Community pakhatin he buaina hi mi pakhat chawhchhuah an ti a. Chief Minister tel lovin member 49 in la nei a. Prime Minister hian Biren Singh thlak mai rawh se. Remna awm theih nana mi pakhat thlak chu eng nge a harsat em em? State te reuh têa remna i thlen thei lo a nih chuan ram lian takah engtiangin nge remna i siam theih tehlul ang,” a ti bawk.