India nena inkungkaihna tihthar kan duh – Bangladesh

India nena inkungkaihna tihthar kan duh – Bangladesh
Bangladesh chuan India nena inkungkaihna ‘tihthar leh’ a duh a, ram pahnih tana hlawkpui ve ve theih tur thlira thawhhona siam a duh tih an ram Foreign Affairs Humaiun Kobir-a’n a sawi a. Prime minister paih thlak tak, Sheikh Hasina-i sorkar inkungkiahna kha chu ‘a hahdamthlak loh’ tih a sawi bawk.
Sorkar hotu lianin hetiang a sawi hma lawk hian Bangladesh chuan India-a BRICS Summit-ah Prime Minister Tarique Rahman-a a tel ve dawn loh thu leh ‘sawm dan pangngai taka sawm a ni lo’ tih a sawi.
India hian Rahman-a hi an ram tlawh tur leh BRICS Summit-ah pawh BIMSTEC chairman a nih avanga tel turin a sawm ngei a. Hetih lai hian Dhaka chuan sawmna hi an pawm lo thung.
Tar lan tawh thin angin August, 2024-a thalaite kaihhruaia lungawi lohna lantira paih thlak tak, Hasina-i tlanchhiain an thenawm ram a pan hnuah New Delhi-in a lo hum atang khan India leh Bangladesh inkar hi a chhe tan.
Kobir-a chuan Pathianni khan Dhaka-a thuthar lakhawmtute a kawmnaah Bangladesh chuan India nena inkungkaihna ‘tih that leh’ a duh tih a sawi.
“Tam tak inrawlhna tel lo, kan pahnihin sawihona kaltlanga inkungkaihna thar siam tura hma lam pan kan duh,” a ti.
Kobir-a hian Bangladesh chu India nena indawrnaah ‘thil tih awm ang lo thil’ a awm chuan a kal kian nghal tur thu leh New Delhi nen inbuktawk taka indawr a nih tur thu a sawi a. Sawiho turah ram pahnihte ngaih pawimawh dah pawimawha ram dangte pawhin an thlir thei siam an duh thu a sawi.
Zawhna chhangin minister chuan, “India-ah tukthuan, India-ah chawchhun, India-ah bawk zanriah, engtikah nge nangma chaw i ei ve ang?” tiin inbuktawka inbiak a tul thu a sawi.
“India-in a duh dan anga thil a tih tumna kan duh lo va. India hi ram hrang a ni a, Bangladesh pawhin inkungkaihna tha a duh a ni,” a ti.
India nena an inkar chu hmaichhana inbiakna hmanga siam that leh a tul tih a sawi a. “Ka sawite hi India tana tih theih a ni a, keini chuan inkungkaihna tha neih kan duh a ni,” a ti.
Hetih laii hian rorel lai, Bangladesh Nationalist Party (BNP) Chief Whip Nurul Islam Moni-a chuan an ram parliament-ah Zirtawpni khan Dhaka chuan India nena inremna an ziah 101 an ennawn tih a sawi.
An thian tha ramin Chattogram leh Mongla lawng chawlhna an hman theihna an paih tih a sawi chungchang zawhnaah, “Inremnna kan ennawn a, MoU ziah tawh zawng zawng, 101 kan ennawn vek a. A hrin chhuah chu a lo chhuak thuai ang,” a ti.
Kobir-a pawh MoU 101 ennawn chungchang hi zawh a ni a, parliament rorelna kalhmang anga ennawn a nih thu chauhvin a chhang niin Bangladesh-a The Daily Star chuan a tar lang.