Bawngkawn – Leitan inkar protected area-ah in sa 12
Bawngkawn – Durtlang Leitan inkar ‘protected area’ High Court thu zawm loa in sa 12 an awm a. Aizawl Municipal Corporation chuan sa mekte chhunzawm lo tura a tih bakah sa zo tawh te chu thiahsak tumin hma a la mek.
Kumin July 25 khan AMC official-te chu Bawngkawn leh Durtlang Leitan inkar kawng a hmunah tlawhin, protected area-in a huam chin chiang zawka hriat a nih theihnan an teh tha a. July 26 khan Municipal commissioner hoin AMC enforcement staff-ten inspection nei lehin dan lo anga in sa enfiah nghal a ni.
Gauhati High Court PIL (Suo Moto) thuchhuak zawm loa in lo sa lui mek K Zasanga, Ramhlun North chu a in sak titawp nghal tura hriattirna ‘stop development order’ pek a ni a. K Zasanga hian a in sak hi tawp tura tih a nih hnuah pawh a chhunzawm leh tih hriat a nih avangin August 1 khan dan anga a chunga hma la turin Bawngkawn Police Station-ah AMC chuan FIR a thehlut a ni.
Gauhati High Court thuchhuak zawm loa Bawngkawn leh Durtlang Leitan inkar kawng dunga in sak phalna neia in sa mek, floor khat pawh la sa zo lote, in sa mekten an chawlhsan ngei em tih te, dan phal loha hma thar la an awm em tih leh, petrol pump tura laih mek titawp tura tih chuan a tawpsan em tih enfiahin July 30 khan AMC hmalaknain AMC, Aizawl DC leh Aizawl SP aiawhten joint inspection an nei a. Hemi ni hian court thuchhuak bawhchhiaa hma la an awmlo nia hriat a ni.
Site inspection neihah hian phalna nei loa protected area chhunga in sa mek leh sa zo tawhte enfiah a ni a. Tunah hian Bawngkawn leh Durtlang inkar kawng protected area huamchhungah dan bawhchhiaa in sa mek leh sa zo tawh mi 12 an awm tih hriat a ni. Heng zinga mi 5 chu an in thiat tura tihna – demolition order pek an ni tawh a, an zinga pakhat chuan thupek zawmin kumin May 8 khan a thiat. Thupek zawm lo mi pali chungah pawh hma la chhunzawm turin AMC chuan a buaipui mek a. In sa thar zinga mi pasarih chu an in sak mek/ sak zawh tawh thiahsak turin hma lak a ni a, dan anga insawifiah tura hriattirna (show cause notice) pek an ni tawh a ni.
Bawngkawn leh Durtlang inkarah Lalhruaisanga, Chawntlangpui, Lawngtlai district-in in sakna tur lei a laihah a lei a laih hian leimin nasa tak a thlen avang leh he chhiatna thleng hian mipui tana harsatna a siam avangin AMC chuan pawi a tih thu a sawi a. Mipui tan harsatna nasa zawk a thlen tawh loh nan theihtawpin hma a la zui zel tih a sawi a ni.