Handloom Day denchhen exhibition

10th National Handloom Day denchhenin Aizawla Millenium Centre Rooftop-ah sawrkar laipuia Ministry of Textiles leh Mizoram Commerce & Industries department tangdun chuan August 1-4 chhung hian ‘Hathkargha Mela/State Handloom Exhibition’ an buatsaih a. Ningani khan Commerce & Industries minister F Rodingliana’n a hawng.
Minister chuan handloom kaltlangin Mizoram hmun hrang hrangah mi engemawzatin eizawnna ngelnghet an nei tih sawiin, handloom chu kan hnam ziarang phochhuah leh humhim kawnga hmanraw tangkai tak a ni mek tih a sawi. Handloom-in hma a sawn zel theih nan kan kutchhuak chawisan leh ngaihhlut nachang hriat chu mitin mawhphurhna a ni, tiin, nasa zawka hnam ziarang phochhuah a nih theih nan Commerce & Industries department thawktute chuan handloom lama tuimite an kaihhruai fo a pawimawh tih a sawi bawk.
Sawrkarin kuthnathawk, hlawhtlin tuma beitute tha tichak tura tanpuina pek a ngaihpawimawh tih a sawi a. Handloom lama tui, ‘hand holding policy’ hnuaia tanpui tlakte dapchhuah leh tanpui dan tur ruahmanna siam turin thawktute a chah a ni.
Commerce & Industries director Maria CT Zuali chuan hnam ziarang pholang thei thuam hrang hrang siam leh chawilar kawngah Mizo hmeichhiate fakawm a tih thu a sawi a. Handloom chu eizawnna tlak a nih angin, a tuimite chu tan la zel turin a fuih.
Exhibition-ah hian Heritage handloom-ten an kutchhuak thuam chi hrang hrang phochhuakin an entir a. Stall 60 an inpho a ni.