Doctor zingah ruihhlo avanga hna thawk tha thei lo an awm – Health minister

Medical doctor zingah ruihhlo avanga hna thawk tha thei lo an awm nia sawi a awm leh thin tih Health minister Lalrinpuii chuan sawiin, senior zawkten ruihtheihthil laka fihlim turin hrilh thin se a duh tih a sawi.
Health & Family Welfare minister hian Ningani khan District Hospital Kolasib a tlawh a, a hmunhma fangin, thawktute leh khawtlang mi pawimawhte nen an inkawm a. Kolasib District Hospital sak lai mek chu a hmunah a en bawk
Doctor-te lakah mipuiin beiseina sang tak an nei a, an tawngkam chu damlote tan damna leh thlamuanna tling a ni tih Lalrinpuii hian sawiin, chutih laiin doctor thenkhat ruihhlo avanga hna thawk tha thei lo an awm thin nia sawi awm thin chu pawi a tih thu a sawi.
Kolasib District Hospital chu OPD leh IPD-a enkawl an neih zat atanga chhutin, Aizawl leh Lunglei tih lohah Mizoramah a san ber avangin ngaihtuah ngai bik ni ah a ngai tih minister hian sawiin, ‘Tun aia tam zawk specialist kan neih a, ward pawh mumal zawka kan neih hunah chuan hmundang pan ngai loin damlo tam zawk in enkawl thei tawh dawn a ni,” a ti.
Kolasib bialtu MLA, deputy speaker Lalfamkima chuan an district chu ramri depa awm a nih avangin, sawrkarin a ngaihsak a ngai tih a sawi a. Kolasib District Hospital chu thenawm district leh Mizoram luhka, motor kawngpuiin a paltlang a nih avangin damlo leh accident awm thutah pantu an awm thin tih a sawi a ni.
Health minister hian Kolasib a panna kawngah Lungdai PHC leh Kawnpui PHC bakah School of Nursing Thingdawl a tlawh a. Kolasib Vengthara Urban PHC dahna tur leh Kolasib Venglai East-a UPHC dahna tur hmun a tlawh bawk.