Iran-in Haniyeh vuina bul tan

Iran chuan Ningani khan Hamas political chief Ismail Haniyeh chuan Tehran-a Israel-in a tihhlum tia sawi chu vuina bul a tan a.
Islamic republic supreme leader Ayatollah Ali Khamenei chuan Doha a vui tur Haniyeh sunna chu tanin a hma pawhin Haniyeh thihna chu phuba lak a ni ang a lo ti tawh bawk.
Tehran-a city centre-ah Haniyeh thlalak leh Palestinian flag te vai niin mi tam tak an pungkhawm a ni.
Haniyeh kha Iranian capital Tehran-ah zing lam dar 2 velah a bodyguard nena tihhlum an nih thu Iran Revolutionary Guard te chuan an sawi a.
A hma lawkin Israel chuan Lebanese capital Beirut-ah Hezbollah commander Fuad Shukr chu a lo tihlum tawh bawk a. Israel chet dan chuan indona zau zawk a tihchhuah hlauhna a lian hle bawk.

Phuba lak kan tihtur : Khamenei
Khamenei, Iran political affairs a thu ber chuan Haniyeh thih hnuah ‘Islamic Republic of Iran territory a martar a nih avangin a thisen avanga phuba lak kan tihtur a ni’ tiin a sawi.
Haniyeh kha Tehran-ah President Masoud Pezeshkian lakluh inkhawma tel tura kal a ni a.
Iranian president pawhin, “Zionist (Israel) hian dawihzep taka an chet dan nghawng an hmu thuai ang” tiin a sawi.
Hamas political bureau member Musa Abu Marzuk pawhin phuba an lak ngei tur thu sawiin, “Leader Ismail Haniyeh tualthihna hi dawihzep thiltih niin chhan let lohin a awm lovang a ti bawk.
International community te chuan boruak sosang a awm loh nana insum turin leh Gaza-a inkahhai a awm theihna tur thlurbing ni se an ti thung a.
UN Secretary-General Antonio Guterres chuan Tehran leh Beirut a inbeihna thleng chuan buaina a tisosang a ni a ti.
Gaza-a inkahhai awm theih nan kawng tinrengin hmalak a ngai a, southern Israel October 7-a Hamas tena an beih avanga mi tang an la kawlte chhuah zalen nen thlurbing tur a ni, a ti.
US Secretary of State Antony Blinken pawhin Gaza-a inkahhai siam chu tihmakmawh tia sawiin White House National Security Council thupuangtu John Kirby pawhin Israel strike chuan regional tension sang tak a tipunlun dawn a ti bawk.
Iran-ah chuan khawpui lian hrang hrangah mipui ten kawtthlerah lungawilohna lantirin Middle East ram hrang hrangah pawh Haniyeh thihna chu an dem hlawm a. Tehran-ah chuan Palestine Square ah punkhawmnaah “Death to Israel, Death to America” ti ten an aurual a ni.
Islamic Republic chuan Haniyeh thah a nihna hmun chiah chu an la sawi lang duh lo va. Iran chuan Haniyeh tihlumtu chu a hmelma kumhlun Israel a ni a ti thung.
Gaza indona kal mek zel chuan Middle East-ah boruak a tisosang tawh hle a, Iran thlawp Syria, Lebanon leh Yemen a militant group te leh Israel chu an inbei chamchi tawh a ni.
Yemen-a Houthi rebel te chuan Haniyeh chu ni thum chhung an sun tur thu puangin an political leader Mahdi al-Mashat chuan Palestinian mipuite leh Hamas te chu tawrhpuina a thawn bawk a.
Saudi foreign minister Prince Faisal bin Farhan thung chuan Iranian foreign minister Ali Bagheri chu helai region thil thleng mek chungchang sawipuiin phone-in a be bawk.
UN Security Council pawh Iran-in a ngenna angin an thukhawm nghal bawk a. Tehran envoy Saeid Iravani chuan member te chu international law bawhchhiat a nihnaah hremna lekkawh turin a ngen a ni.
Israel Prime Minister Benjamin Netanyahu chuan nikum October 7 a Hamas tena Israel an run avanga Israeli 1,197 in nunna an chan phah leh mitang 200 chuang an lak avangin Hamas te chu nuai chimih a intiam a ni.
Israel-in Gaza a Hamas te a beihna kal zelah mi 39,445 in nunna an chan tawh tiin Hamas-run health ministry chuan a tarlang bawk.