Trump-an Harris identity-ah zawhna a nei

Donald Trump chuan Kamala Harris identity-ah zawhna a neih thu black journalist te nena an inkawmnaah a sawi a.
Trump chuan vice-president leh Democratic nominee ni mai tur chuan a hma zawngin Asian-American a inti a, tun hnaiah black a inti ta daih a ti bawk.
“A hma chuan black a ni tih ka hre lo va, mahse, tun hnaiah black ni ta daihin black tia hriat pawh a duh a ni” tiin National Association of Balck Journalist convention, Chicago a neihah Trump chuan a sawi a.
“Indian nge a nih, mihang zawk ka hre lo” tiin Trump chuan a sawi zui a.
Harris chuan Trump thusawi chu chhang nghalin ‘inthendarh leh inzahlohna a lantir hlui ang bawk a lantir leh tawh’ tiin a sawi ve thung a.
“American mipuite hian tha zawk an phu a ni” tiin Harris chaun Sigma Gamma Rho, Houston a thusawina a neihah a sawi a. “Hruaitu kan inanlohna te hrethiama min thendarh tum lo kan mamawh zawk, chu chu kan chakna lakna ber tur pawh a ni” tiin a sawi.
Kamala Harris chu black leh Asian-American vice-president hmasa ber niin Indian leh Jamaican kara piang a ni a. Howard University, black university a ngaih chhuak niin black Alpha Kappa Alpha sorority pawh zawm a ni.
Kum 2017 khan Senate a luh hnuah Congressional Black Caucus member a ni bawk.
Chicago event-ah hian Trump chu moderator zinga pakhat ABC News correspondent Rachel Scott nen an inhnial deuh bawk a. Harris chungchang a sawinaah Trump chuan “Indian emaw black pawh ka zah ve ve” tia sawiin, “Amah zawk hian zah lo zawk a ni a chhan chu a hma zawngin a Indian a, tunah lem thawhklehkhatah mihang a ni leh daih a ni,” a ti.
Trump chuan Harris chu a chungchang an sawihonaah pawh bei hrepin Harris chuan a legal career-ah exam neihah a hlawhchham tiin a sawi a.
“Thudik a ni ka sawi ni. A bar exam a pass zo lo va, a pass pawin ka hre lo, a pass theih pawh ka ring lo, eng nge thleng ka hre lo va, a lo pass pawh a ni thei,” tiin a sawi.
Kamala Harris chu University of California Hastings College of Law atangin kum 1989 khan a graduate a. New York Times chuan a exam hmasaah pass zo lovin a vawi hnihnaah a pass a ti a. California state bar test-ah hian exam hmachhawn zahve vel lawihin tum khatnaah an paltlang zo ngai lo tih a ni thung.