Damdawi dawrah CCTV

District Magistrate, Aizawl District chuan, Aizawl district huam chhunga Schedule H leh Schedule X drugs zuar damdawi dawr zawng zawngten an dawrah CCTV an vuah vek tur a ni, tiin tun hnai khan thupek a chhuah a. Thupek zawm lote chu BNS Section 223 hmanga an chunga action lak theih a nih thu tarlan a ni bawk.
Schedule H leh Schedule X drugs hi doctor lehkha tel lova hralh chhuah thiang lo damdawi a ni a. Schedule H drugs-ah hian damdawi chi 500 chuang awm in, Schedule X drugs-ah chi 16 vel a awm bawk a. Schedule X drugs zingah hian kan hriat lar em em Amphetamine leh Methamphetamine te pawh an tel a ni.
Schedule H damdawi eng chi emaw ber tal hi chu damdawi zawrh phalna license nei tan chuan zawrh tel ngei ngei ngai a ni deuh ber awm e. Chuvangin, damdawi dawr tawh phawt chuan CCTV hi an vuah a ngai dawn a nih hmel. Eng tiang chiahin nge CCTV hi set up a nih dawn hriat ni lo mah se, thildang atan pawh a tangkai telin a rinawm.
Damdawi zuartuten, Registered Medical Practitioner-te damdawi chawhna lehkha ‘prescription’ tel lova damdawi an hralh tur dan nana CCTV hi hman a nih dawn chuan, prescription-te hi chiang leh fiah taka CCTV-a tihlan zel a ngai dawn tihna niawm tak a ni a. Hei hi hna hnih deuh, buaithlak viau tur anga ngaihna a awm maithei a; mahse, cash memo-a damdawi hming leh a chawhtu doctor hming ziah lan zel ai chuan a samkhai letling phian maithei. Eng pawh ni se, kan him tlanna tur a nih dawn chuan kalphung kan zawm mai tur a ni.
Damdawi dawr thenkhatin doctor lehkha tel lova damdawi an hralh thin avang hian, ruih sual nana hman chi damdawi eng eng emaw pawh hi awlsam takin dawr atanga lei theih a nih avangin thalaite ruihhlo laka an buai phahna chhan a ni thei tih a chiang awm e. Chuvangin, CCTV hian ruihhlo dona kawngah pawh a thawh hlawk phianin a rinawm.
Hetih rual hian, system tha tak anga lang pawh hi, a kenkawh/vil zuina lama kan khauh peih leh si loh chuan awmzia a nei tak tak thin lo. Eirukna a hluar kan tih chhan pawh hi, sawrkarin inenkawlna dan tha tak leh system tha tak a duante hi a nihna tur anga kenkawh a nih thin loh vang mai a ni. Damdawi dawra CCTV vuah pawh hi, a nihna tur anga kenkawh that a nih chuan kawng hrang hrangin kan hlawkpui ngei ang tih a rinawm a ni.