Cyclone tuarte tan centre-in chhawmdawlna sum pe dawn

Union Home minister Amit Shah chuan Cyclone Remal tuartute tan chhawmdawlna sum an rawn pe dawn tih a sawi a. Assam Rifles chu Aizawl laili atangin a tahtawlah an chhuah tur thu a sawi bawk. New Delhi-a kal chief minister Lalduhoma chuan Ningani khan Union Home minister hi a hmu a. Tunhnaia sawrkar laipuiin raltlan (displaced persons) te tana Mizoram sawrkar hnenah cheng vaibelchhe 10 a pek avangin lawmthu a hrilh. Manipur harsatna tawh thu ah Home ministry leh Manipur tlangmite aiawh ITLF hruaitute chu inbe thei se thaa a hriat thu a sawi a. Manipur chief minister Biren Singh-a’n Imphal-a zin tura a sawmna tihhlawhtlin sak a duh thu Amit Shah hi a hrilh a ni.
Union Home minister hian Cyclone Remal tuartute endika rawn kal, special team report chu Finance ministry-ah a la awm rih a, a rang lamin an lo ngaihven dawn tih a sawi a. Chhawmdawlna sum pawh engemawzat an rawn pe dawn tih chief minister hi a hrilh.
Assam Rifles sawnchhuah chungchang an sawidun a. Assam Rifles lamin an MoU tur an peih har avanga hmalakna a khawtlai tak thu sawi a ni. Union Home minister hian ministry atangin officer lian pahnih a rawn tir anga, an ni ho nen Aizawlah Assam Rifles nen lo sawidun leh turin ruahman a nih thu a lo hrilh a. A tahtawla an chhuah phei a tul tur thu pawh a sawi. Chief minister hian Assam Rifles leh Mizoram sawrkar ngaihdan inhmu rem lo lai a awm a nih chuan inpawh taka sawi ho an inpeih thu a sawi a ni.
Chief minister hi Intelligence Bureau director Tapan Deka chuan Ningani zan khan Mizoram House-ah hmuin Mizorama hmalak dan tur thil an sawi dun a. JICA hotute leh KMMTTP contractor-te pawh koin an hnathawh mek leh hmachhawp a sawipui bawk.