Phal lohna hmuna inzuarte…

Thuampui leh Falkland veng inkara inzawrhna hmun tura ruahman bik ‘vending zone’ ni lova inzuarte chu Aizawl Municipal Corporation chuan inzuar tawh lo turin a hriattir a. Vending zone ni lova inzuar lui an awm a nih chuan vawiin August ni 3 atang hian AMC chuan an chungah action a la dawn a ni.
Helai hmun kawngsira inzuar zingah hian, dan lo anga building lo sate pawh an awm hman a ni awm a, thiat turin hriattir an ni nghal bawk a. Helai hmunah hian dan kalha thiltih a lo awm nual hman niin a lang.
Helai hmun hi chi hnihin a then theih ang a, AMC building hnaih lam hi vending zone-a puan niin street vendor license neite thutna tura ruahman a ni a. Hemi piah lam kawngsir, tuna building lo sa hialte pawh an awm tawhna lai bawr vel hi chu vending zone-a puan pawh a lo ni chiah lo niin sawi a ni a. Vending zone ni lovah hi chuan identified Street Vendor-te pawh an thu thei chuang lo a ni, dan ang chuan.
Vending zone chungchanga thuneitu leh hmalatu hi “Town Vending Committee for Aizawl City” a awm a. Hei hi Mizoram Street Vendors(Protection of Livelihood and Regulation of Street Vending) Act, 2012 hnuaia dan ang thlapa din a ni a, Municipal Commissioner kaihhruaina hnuaiah a awm a. He committee hian Aizawl khawpui chhunga vending zone turte pawh a ruahman a ni.
Hetih lai hian, AMC hnuaia Local Council thenkhat hi chuan, an area chhunga revenue an lo tuak ve nan hian an thuneihna huangchhung piah lam deuh thil eng eng emaw an lo ti ve thin niin a ngaih theih a. Hetiang thil hi a thleng thin a nih chuan, dan hnuaia thawk turte berin dan an palzut tihna a ni ang a; tin, AMC leh Local Couincil-te inkarah inpawh tawn taka thawhhona ‘coordination’ a tha lo hle tihna a ni thei bawk ang. Hetiang thilah hi chuan, dan anga han kal dawn pawhin hnawk then tur hi a awm leh thin. Dan kenkawh chungchanga thusawi lar tak, ‘Let the law take its own course’ tih pawh hi keiniah hi chuan ‘a theih loh alawm’ tih mai tur a ni leh thin.
Dan hian a kawng a zawh thin loh avangin a tawpah kan buai leh luai luai thin. Danin a kawng a zawh dawn chuan dan kengkawhtute an pawimawh hmasa ber a. Dan kenkawh thatna ram apiang hi ‘ram changkang’ kan tihte hi an ni zel tih pawh kan hre vek a, mahse, hre kur chung si hian kan zawm thei lo a, chu chuan dan zawmlohna hi a hring chhuak ve zel niin a lang. Mizoram rorelna in sang ber Legislative Assembly House bula bazar pawh, security measure thilah, a sawnna tur Tuikual South bazar building lianpui mai sak zawh a ni tawh chungin, tun thleng hian an la insawn thei lo.
Dan siam hi, siam a nih hnua ngaihhnathiamna nena dan sir deuha kalpui leh tura siam a ni ngai lo.