Ruling MLA-te mahni biala awm tam tura beisei kan ni – Lalbiakzama

Chalfilh bialtu MLA, Assembly speaker Lalbiakzama chuan sawrkar thar chu mipui sawrkar a nih angin, ruling MLA-te chu a tam thei ang ber an biala awm tura beisei an ni tih a sawi.
Inrinni khan Phullenah Lalbiakzama hian Chalfilh bial MLA office a hawng a. MLA chuh tura a rilru a buatsaih tan atanga a duhthusam pakhat, bial chhunga MLA pisa dah a tihlawhtling thei chu lawmawm a tih thu a sawi. MLA pisa chu bial mipui ta a ni a, mipui vanga he pisa hi piang thei chauh a ni, tiin, Chalfilh bial pisa pui nihna phurchhuak tur khawpa a tangkai theihna’n tanrual puiah mipui a sawm tih a sawi a ni.
Mizoram sawrkar thar chu mipui sawrkar a nih angin MLA zawng zawngte mahni bialah a tam thei ang bera awm tura beisei an nih bakah kawng tinrenga mipui ban phaka inchhawp hnaih chu sawrkar rilru a ni tih Assembly speaker hian a sawi a. Bial chhunga MLA pisa neih chu hemi kawnga an thil tum tihlawhtlingtu a ni thei tih a sawi. “A tum bulpui ber chu, bial mipui ban phaka indah a ni. Sawrkar kalphung atana ruahman chu mipui ban phaka awm maiah a tawp loa, mipui vawn tura ban theh chhuak a, va vuantu leh an mamawh tihsak tura ‘Bana kaih policy’ hmanga mipui khaichhuah a ni,” a ti.
Khaw chhak chan lam, langa Aizawl dawr phak lohna huamchhunga hmun laili ber a nih avangin Phullen hi MLA pisa hmun atan an thlang tih a sawi a; duhsak bik khua nei loin bial mipui tana tha ber tura an ngaih vanga he hmun hi thlang an ni tih a sawi bawk.