Mizo Village Volunteer kum khat tling ta

MVV an ti a, Mizo Village Volunteer tihna, khua leh ram vengtute an ni. Kum khat an tling tawh a, ram an la chan lo. Zo hnahthlak chi peng dangte pawhin mahni khaw vengtu pawl an nei a, khua leh ram an la chan lo tih an sawi.
Manipur-ah Zo hnahthlak chi peng hrang hrang an awm a, nikuma Meitei nen ram inchuha an buai khan Zo hnahthlakte hian mahni hmun theuhvah pawl an din a ni. Mahni pualin pawl an din a, inpuiin an tangrual vek tho.
MVV hi Duhlian tawng hmangte pawl a ni a, YMA awmna chinah MVV hi an ding tiin a sawi theih. Churachandpur district vel an veng a, nikum August ni 1 kha an din ni-ah an chhiar a ni.
Kuki lamin United Tribal Volunteer an din a, Hmar-in United Volunteer Council, Zomi lamin Central Village Defence Force an din bawk. Pawl dang pawh a la awm.
Pawl hrang hrangte hian enkawl chin an nei a, mipui tangrualin heng pawlte hi an enkawl a ni.
Tun hnaiah Zo hnahthlakte leh Meitei hi an inkap bur bur tawh lo a, mahse a lehlam lehlam hi inring rengin an la awm. Zo hnahthlakte’n mahni ram an la veng reng a, ‘training’ pawh an la nei reng.
An buai vanglai khan mahni pawl theuhvah pawl hrang hrangin training an neih bakah inzawmkhawmin ‘special training’ an nei thin a, pawl hrang hrang hrang atangin a inzat theuhvin an kalkhawm a, a huhovin training an nei thin. Chutianga training chhuakte chu ‘commando’ ti te pawhin an sawi thin.
Manipur atanga thu dawn danin, buai vanglai khan training hi chawlhkar khat te, ni 10 te an nei thei chauh a, tunah chuan thla khat te pawh an nei thei tawh. Thla hnih neih theih chang te pawh an nei.