Assam-ah Muslim-te nekchep dawn

Assam BJP sorkar chuan Asembly-ah bill thar pharh vat dawnin chumi hmang chuan Hindu-te ram Muslim tena an lei dawnin Chief Minister phalna lak hmasak zel a ngai tawh dawn.
Assam CM Himanta Biswa Sarma chuan tun hnai kum thum chhungin community pakhat (Muslim a sawina) mi huangdai chi te atangin sorkar chuan ram zau tak Chandigarh city tia vel a lalet tawh tiin a sawi.
“Mahse ram Chandigarh 20 tia vel chu an la luah mek a ni. Heng ram te hi indigenous mi tena an neih let leh theih nan theihtawp kan chhuah zui zel ang,” tiin Sarma chuan a sawi bawk a.
“Tun hma kha chuan sakhua leh sakhuaa ram inleitir te kha thil pangngai a ni a, mahse kan sorkar chuan Assembly ah bill thar pulut dawnin chumi hmang chuan Hindu ram te Muslim tena an lei dawnin Chief Minister remtihna lak zel a ngai tawh dawn a ni” tiin Guwahati a BJP worker te hnena thusawina a neihah a sawi bawk.
“Goalpara district a Koch Rajbongshi community te chu politics thil takin an la tha em em a. mahse, tun hnai kum sawm tamah an ramah ngei minority ni tawhin an ram te chu community pakhat ten an chhuhsak zel a ni. Mahse kan sorkar chuan indigenous community te ram chu community pakhat te hnenah hralh a remti tawh dawn lo” tiin a sawi bawk.
Assam Chief Minister Biswa Himanta Sarma chuan sorkar chuan domicile policy thar siam dawn bawkin chumi hmang chuan Assam-a piangte chauhin State sorkar hna an thawk thei ang, a ti bawk.