Manipur-ah sorkarin Pathianni thleng zirna in khar

Manipur sorkar chuan Ningani atang khan Pathianni thlengin an state chhunga zirna in zawng zawng chu dan leh thupek dinhmun derthawng avangin kharna tur thupek a chhuah.
Nilainia sorkara Education (School) Commissioner Ningthoujam Geoffrey-an hriattirna a chhuahah hian Board of Secondary Education Manipur, Council of Higher Secondary Education Manipur, Central Board of Secondary Education hnuaia mi leh a dangte pawh khar vek turin a ti.
Thupekah hian sikul chawlh tur hi ‘state chhunga dan leh thupek dinhmun mek thlirin’ thutlukna siam a ni tih tar lan a ni a. College, zirna sang leh university zawng zawng pawh a huam tih tar lan a ni bawk.
Hetih lai hian Manipur-ah hian Meitei pawl, Campaign for Just & Fair Delimitation (JFD)-in Thawhlehni atanga darkar 48 awh bandh an huaihawt chuan phaizawl district-ah nunphung a tibuai hle a. Bandh hi chhiarpui neih hmaa National Register of Citizens (NRC) tih hmasak an phutna avanga huaihawt an ni.
Meitei pawlte chuan NRC chu kum 1951 hnu lama pawn lam atanga Manipur-a luta inbengbelte hriat chhuah nan tih an duh a, heng mite hi ram mi dik takte tana hlauhawm ni thei an nih thu an sawi.
Kuki pawlte chuan hei hi duh lovin Meitei-te hian an hnam chu dan lova an ram chhunga awm anga chhuah an tumna niin an sawi a. An thenawm, Assam-ah kum 2019 khan NRC hi tih niin kum 1971 hnu lama an state-a pem lutte hai chhuah nan an lo hmang tawh a ni.
An thil phut lantir nan hian JFD-a zirlai pawlte chuan Imphal East-a Directorate of Census Operations pisa an lo khar tawh a, chhiarpui neih tura enumerator leh supervisor-te training centre pawh an kharsak bawk.
Nilaini vek khan sorkarin hriattirna hran a tihchhuahah charge officer/Sub-Divisional Officer, Lilong, Imphal West, Moirangthem Priyaroshni Devi chuan ‘supervisor, enumerator leh field trainer-te telna tur Census Training Programme chu thulh a ni’ tih a tar lang.