Olympic history-a 100m final chep berah Noa dingchang hram!

Mizote chuan Noa kan ti ang a, American leh khawvel chuan Noah an ti ang, chu American tlangval kum 27 mi Noah Lyles chu leilunga tlanchak ber thar a ni.
Keini huna Pathianni zan tlai tawh takah khan Olympic Games-a mite ngaihven leh hmuh chak berte zinga mi ni kumkhua mipa 100 metres intlansiak final-ah second 0.005 (bete bawk aia tlem!)-in amah hnaih bertu Jamaican Kishane Thompson a thlen khalh.
Noa hian heti chena thui tlankawnga a thlen hma ber hun (personal best time) tawngbuain second 9.79 a hmang a, Jamaican tlanchak Thompson-a thlen hun pawh second 9.79 tho ni bawk mah se chik lehzual gold medal awrh tur zawk an endiknaah mihang theifal pahnihte hi second 0.005-in an lo inthlau hlauh a, Olympic Games men’s 100m final chanchina pakhatna leh pahnihna thlen hun inhnaih ber record thar khawvelin a thlirliam rualin, kum 20 chhunga a vawikhatna atan United States kutah he title hlu bik hi a lut ve leh ta a ni.
Asthma, allergies, dyslexia, ADD (attention deficit disorder), anxiety leh depression natnain a tihbuai thin Noah Lyles chu men’s 100m Olympic champion thar a ni ta a, Stade de France, Saint-Denis, Paris-a 100 metres final tlankawng thui zawng kha metre 99 chu ni se Pathianni zan hma zawnga kumin chhunga mipa tlanchak ber ni reng thin Thompson kha Olympic hnuhnung vawingaa men’s 100m title la thei Jamaican palina ani dawn a, mahse, a hamwrbawkna tak takah Lyles a pawng che che a, world title a kawl belhchhah turin a trophy dahthatna bawmah Olympic gold a tar belh thei ta a ni!
Second 9.81 chhunga tlan thleng American Fred Kerley chuan bronze medal awrhin, Akani Simbini of South Africa chu palina a ni a; zaa za fit loh vanga malpuia inhreng nuai defending champion Lamont Marcell Jacobs of Italy (9.85) chu panganaah thlengin, Botswana ram tlanchak Letsile Tebogo chuan national record thar (9.86) siamin parukna a luah.
Intlansiak zawha an kawmnaah Lyles chuan, “Ka chak kha ka ring lo a, a hun takah khan ka lo lawr zeuh ang tih pawh ka ring pha lo a, result kan nghah lai khan Kishane lam hawiin amah chu hnehtu nia ka hriat thu ka va hrilh hman a, mahse, ka hming an lam ta mai si a, Oh my gosh, mak tihnain ka khat,” a ti.
Kum 2004 champion Justin Gatlin hnu lama American Olympic 100m champion ni leh thei hmasaber Lyles hian inbeihna hautak a nihzia thu sawi chungin a awh em em title a nih thu a sawi a, a elpuite tlanchak a tihzia hahipin a sawi bawk.
Rilru lam harsatna hrang hrangin a tlakbuak chunga Olympic podium sangber lawnkai thei US sprinter Noah hian nizan lam khan lak zewn zen harsa tak Olympic sprint double beiseiin 200m opening round a hmachhawn zui leh a, a dinhmun tarlan hman a ni lo.
A second zawnga an thlen rual avang khan gold medal kha insem mai turah a ngai em tih zawhna chhangin tling zo ta lo zawk Jamaican chuan, “He sport zet hi chu inelna hi a ni lehzual a, gold medal insemna chi pawh a ni lo,” ti lam hawiin a chhang!