Pianpun inzirtirna atan naupiang lawmpuina pe

Pianpun a tul zia inzirtirna atan Aizawl East II bialtu MLA, minister B Lalchhanzova chuan a bial chhunga nau piang thar ho hnenah lawmpuina thuziak leh sumfai a hlan.
MLA inthlan dawn campaign laia a lo intiam tawh angin B Lalchhanzova hian, naupiang an lo pun zel theih nan a bial chhunga naupiangte lawmpuina atan thuziak leh sumfai Rs. 1000 a hlan thin a. A thawhkhatna atan 2023 December atanga 2024 June 30 inkara nau piang mi 159 – mipa 82 leh hmeichhia 77 hnenah August 5 zan khan lawmpuina a hlan a, a tahtawla hlan zel a tum a ni.
“Tuna kan pian pun dan dinhmun hi a hniamin a him lo hle a, Mizo hnam hi la ral mai thei dinhmuna kan din avangin piang pung tura tan lak a tul. In leh lo tha tak tak din mah ila, a rochuntu tur tu leh fa kan neih loh chuan hnamdangin an la nei mai mai dawn,” a ti a. Piang pung tura tan lak puiah tlawmngai pawl leh khawtlang hruaitute a sawm tih a sawi.
Naupiang lawmpuina hi Economic & Statistic department hotuten an hmanpui a. Powerpoint presentation hmangin Mizote kan pian pun dan dinhmun an entir bakah pian pun kan mamawh zia an sawi a ni.