ZMC-in an din champha lawm

Zoram Medical College (ZMC) din champha vawi 6-na chu Nilaini khan lawm a ni a. Health & Family Welfare minister Lalrinpuii leh Aizawl South-III bialtu MLA Baryl Vanneihsangi ten an hmanpui.
Sawrkarin health sector, a bikin primary health sector ngaipawimawhin thingtlang mipui ban phak primary health centre hrang hranga doctor indaihlohna phuhruk dan kawng a dap nasa a, ZMC atanga pass chhuak zinga doctor 39 chu National Heath Mission hnuaia thawk tura lak nghal an ni tih a sawi.
Medical college tha nei turin hmunhma leh bungraw tha, zirtirtu fel leh rintlak bakah zirlai tha neih a pawimawh tih sawiin, ZMC-ah Cardio-thorasic Wing din turin sawrkarah rawtna thlen a ni a; IVF Centre neih theih nan ruahmanna siam a ni tih a sawi bawk.
Sawrkar laipuiah ZMC infrastructure tihchangtlunna tur project thlen a ni tih Health minister hian a sawi a. PM Ayushman Bharat hnuaiah ICU, HDU, Isolation Ward, Dialysis Unit leh pawimawh dang kengtel khum 50 awmna Critical Care Block dinna tur hmuh a ni tih a sawi. Medical research lamah tan lak zual a tul tih sawiin, Mizoram leh a chhunga chengte behchhan ngeia research neih a tul a, mipuiin hriselna tha zawk an neih theih nan ngaihtuahna seng turin ZMC-a doctor-te a sawm a ni.
Medical science leh technology chhuak tharte inkawp tlat an nih avangin intuaithara thil chhuak thar ngaihven zel turin ZMC-a zirlaite chu a chah bawk.
Minister hian ZMC-a thil thar – Crawford Gents’ Hostel leh Hospital Management Information System (HMIS) a hawng nghal.
8 ZMC zirlaite chenna tur, Residential Hostel pahnih awmna – Crawford Gents’ Hostel hi NESIDS sum vaibelchhe 10 senga sak a ni a. 2021 October 24-ah hna tanin, 2023 October 24-ah zawh a ni. Contractor hi Ngurzamlova, Kolasib niin Mizoram PWD-in architectural & structural design an siam a, Zopa chhiara chhawng 6 a ni. Single room 10, double room 37 leh khum 84 a awm.
8 Hospital Management Information System (HMIS) hi NHM hnuaia ECRP-2 project kentel a ni a. Nextgen eHospital portal kaltlangin damdawi in hmalakna khawl hmanga kalpui (computerised) tur a ni. He project hi Mizorama District Hospital 11 a kalpui tum a ni. QR code hmangin OPD/ casualty inziakluh bakah appointment book leh cancel a tih theih a. Hospital-a damlo inenkawlna kimchang record, bill siam, damdawi chawh, investigation result leh damlo record awlsam taka enlet theiha dah theih a ni. Laboratory leh Radiology test tih hun tur leh indawt dan, result endik leh report theihna tur siamte a kengtel. ZMC-a HMIS kalpui tur hian cheng nuai 47 vel sen a ni tawh.
* ZMC hi 2018 August 7-ah hawn a ni a; National Medical Commission-in 2023 June 16 khan recognition a pe. Khum 364 awm mekin tunah zirlai 395 – state chhung mi 288, state dang 48 leh NRI 59 an awm. Faculty 112, non faculty doctor 40 leh non teaching staff 572 an awm a. Superspecialist leh specialist hrang hrang department 22-ah a awm. Thisen test chi hrang hrang, Ultrasound, CT Scan leh MRI a tih theih a. Golden Card (AB-PMJAY), Health Care, ESIS, ECHS, RBSK, Dr Ambedkar Scheme-ah empanelled hospital niin, OPD Pharmacy-ah a thlawnin damdawi sem thin a ni.