Bronze pahnih hawntu Bhaker an hmuak ropui
India Independence hnua Olympic Games tum khata medal pahnih la thei Indian kan hmuh hmasakber star pistol shooter Manu Bhaker chuan Paris-ah a tihtur a zo thawkhat tawh a, nimin khan New Delhi thlawklutin, gold hlawhchhuak zo ta lo mah se supporter za telin pangparthi nen India fanu rangkachak an lo hmuak!
Paris atanga Delhi thleng Bhaker phurtu hi Air India flight (AI 142) niin, darkar khat delay avangin an khawtlai hlek a, nimin zing lam dar 9:20 chiah khan Indira Gandhi International Airport-ah a rawn tum a, fans tam takin bronze medallist leh chu dinhmuna hlangkaitu pawimawh pakhat coach Jaspal Rana chu zahna chibai an lo buk.
Tarlan tawh thin angin kum 22 mi Bhaker hian women’s 10m air pistol-ah bronze awrhin, 10m air pistol mixed team event-ah Sarabjot Singh nen tangdunin bromze medal bawk a sualchhuak leh a, India tan Olympic history-ah bung thar a kai.
Manu Bhaker hma hian India hminga Olympic vawikhata medal pahnih lo sualchhuak ve tawh athlete pakhat a awm a, amah chu British-Indian Norman Pritchard niin, Kumpinu lak atanga India indan hma a ni a, sap pachal hian a bu khuarna India ram atangin 1900 Olympic a hmachhawn a, intlansiak chi hnih 200m sprint leh 200m hurdles-ah silver medal a la ve ve a ni.
India pana a chhuah hma lawkin Bhaker-i hian a ram a thlen hunah pui taka an lo hmuah ngei a beisei thu a sawichhuak zauh a, Nilaini chawhma lama New Delhi a luh chuan a beisei ang ngeiin ‘grand welcome’ a dawng a, a vui lo tura ngaih a ni!
A thalaipuite’n pangparbawr leh pangparthi nen an lo hmuak a, rose parte chu double bronze medallist chung zawnah a leng ur ur a, mipui chuan an koki hmangin Bhaker leh Rana chu an zawn hial a ni.
Airport-a a hmuahna hunah hian Bhaker-i nu leh pa Ram Kishan leh Sumedha pawh hmuh tur awmin, anni bakah hian sports tuipuitu mi tam tak an tlim hmur a; a home state Haryana bakah Rajasthan leh a coach Rana chawrchhuahna state Uttarakhand sports official pawimawh tak tak an ther fur bawk.
Nimin chawhnu lam khan Bhaker hi sports minister Mansukh Mandaviya nen inhmuin, a chawl det ang a, Pathianni closing ceremony-a India flag-bearer tur zinga pakhat a nih avangin Inrinni hian Paris lamah a thlawkkir leh rih dawn a ni.