N.Vanlaiphaiin I-Day boycott rel

North Vanlaiphai high school headmaster leh damdawi ina doctor pakhat a thlaktu tur awm lo ve ve a sawrkarin a sawnchhuah sak tak, an aiawh dah tura an ngenna in awmzia a neih theih loh avangin tlawmngai pawl intelkhawm chuan kumin India Independence Day lawmna chu an khuaah boycott an tum.
N Vanlaiphai All NGO Coordination Committee thuchhuak chuan, a thlaktu awm loa Govt N.Vanlaiphai High School headmaster sawn a ni leh N.Vanlaiphai damdawi ina Ayush doctor sawnchhuah a nih chungchangah theihtawpa a aiawh dah tura hma an lakna chuan vawiin thlenga awmzia a neih loh avangin Independence Day programme N.Vanlaiphaia hman tur chu boycott nise an ti.
An beisei anga an ngenna in awmzia a nei lo zel a nih chuan N.Vanlaiphai mipuiin a tul dan ang zela hma lak nise an ti bawk.
N.Vanlaiphai NGOCC hian, thlaktu awm loa High School headmaster leh Ayush doctor sawn chhuah chungchangah hian a changtu minister-te, department director leh secretary ah an lo thlen tawh tih an sawi a ni.