Kawng chhiat vangin Tlabung maxi cab service tawp rih dawn

Vawiin – August 13 atanga tiamchin awm loa an service titawp tura an lo rel tawh chu kaltlangpui an tum tih Tlabung leh Lunglei inkara maxi cab service ho chuan an sawi.
Hemi chungchang sawiho hian Thawhtanni khan Tlabung SDO (Civil) Moses Lalfakawma Tlau chuan Tlabung Maxi Cab Welfare hruaitute a sawipui a. Tlabung Village Council, NH 302 Ngaihven Pawl bakah maxi cab leh pik up neitu pawl aiawh an tel bawk.
Hemi hnu hian service tihtawp an tum hi an kaltlangpui dawn tih Maxi Cab Welfare hruaitute hian an sawi a. NHIDCL enkawl Lunglei atanga Tlabung panna kawng chu tuna a dinhmun ena tlan zel ngamna chi-a an ngai lo tih an sawi nawn. Hetih lai hian nitina mamawh eichawp phur lirthei erawh an tlan a nih pawhin, Tlabung SDO (C), Tlabung VC leh NH 302 Ngaihven Pawl ngenna angin, Tlabung Maxi Cab leh Pik-Up Owners’ Association chuan harsatna an siamsak dawn lo tih an sawi a. Kawng khuar leh nala tan vanga lirthei chhia chu company lamah a siamna senso tumsak tura ngen an rel a ni.
Tunah Tlabung leh Lunglei inkarah hian maxi cab service 30 vel a awm a, kar kalta tawp lama an thukhawmah kawng dinhmun a that loh leh tak avangin tiamchin awm loa an service titawpa din an lo rel tawh a ni.