Taylor Swift ‘TTPD’ kar 14 a No.1 tling ta
Taylor Swift ‘TTPD’ kar 14 a No.1 tling ta
Taylor Swift album ‘The Tortured Poets Department’(TTPD) chu Billboard 200 (albums) chart-ah a No.1 a, he chart-ah hian a zawn lovin kar 14 a No.1 tling ta. Hetihrual hian Ye leh Ty Dolla Sign album thar ‘Vultures 2’ pawh No.2-ah a debut e.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah, streaming atanga album tlukpui leh album-a hla mal hralhna atanga album tlukpui te belhkhawm thin a ni.
TTPD hi kar khat chhungin 1,42,000 hralh lehin, chung zinga 84,000 chu album tak tak hralhna niin, 57,500 chu streaming atanga album tlukpui (on-demand official stream maktaduai 75.43) niin, album-a hla mal hralhna atangin 500 a tling thei bawk.
Taylor Swift hian digital album thar chi nga a official webstore kaltlangin, lei theih tur hun chhung bituk awmin a tichhuak thar a, hei hian a album hralh a tikal thar leh ta a ni. Swift hian a standard album-a hla 16 awmsa bakah bonus track pakhat theuh a dah tel a, album pakhatah chuan ‘My Boy Only Breaks is Favorite Toys’ tih hla ‘first draft phone memo’ a dah tel a, album pali dangah chuan Te Eras Tour a neih meka live track pakhat theuh a da tel bawk.
Hetih hian Taylor Swift album hrang hrang he chart-a No.1 tawh zawng zawngte No.1 hun chhung belhkhawm chu kar 83 a tling ta a, Swift hian soloist zinga he chart-a No.1 ni rei ber a nihna a sawhnghet leh ta sauh a ni.
Ye leh Ty Dolla Sign album thar ‘Vultures 2’ chu 1,07,000 hralhin No.2-ah a debut a, Ye album he chart-a No.2 chin kai thei 13-na niin, Ty Dolla Sign tan he chart-a top 10 kai thei album pathum a neihna a ni ve thung. ‘Vultures 2’ hi 60,500 chu album tak tak hralna niin, streaming atangin 46,000 (on-demand official streams maktaduai 50.44) a tling thei a, album-a hla mal hralhna atangin 500 a tling thei bawk.
Chappell Roan album ‘The Rise and Fall of a Midwest Princess’ chu 64,000 hralh lehin No.4 atangin No.3 a kai ta a, he chart top 3-a a lan vawi khatna a ni. Chart No.1 hlui Morgan Wallen ‘One Thing at a Time’ chu 63,000 hralh lehin No.2 atangin No.4-ah a tawlh a, Billie Eilish ‘Hit Me Hard and Soft’ chu 57,000 hralh lehin No.5-ah bawk a la awm.
Charli XCX ‘Brats’ chu 56,000 hralh lehin No.9 atangin No.6-ah a insawn a, Zach Bryan ‘The Great American Bar Scene’ chu 51,000 hralh lehin No.3 atangin No.7-ah a tawlh a, chart No.1 hlui Morgan Wallen ‘Dangerous: The Double Album’ chu 37,000 hralh lehin No.11 atangin No.8 a kai thar leh a, Noah Kahan ‘Stick Season’ chu 37,000 hralh lehin No.10 atangin No.9-ah a insawn a, Twisters: The Album soundtrack chu 37,000 tling lo deuh hralh lehin No.8 atangin No.10-ah a tawlh ve thung.