Ella Langley “Choosin’ Texas” kar 18 a No.1 tling ta

Ella Langley “Choosin’ Texas” kar 18 a No.1 tling ta
Ella Langley hla hit “Choosin’ Texas” chu Billboard Hot 100 (US singles) chart-ah No.1 a, he chart-ah hian a zawn lovin kar 18 a No.1 tling ta a, Krismas rimnam hla ni lo zinga Hot 100 chart-a No.1 ni rei ber dawttu a ni a, kar 19 No.1 ni thei Shaboozey “A Bar Song (Tipsy)” (2024) leh Lil Nas X Feat. Billy Ray Cyrus “Old Town Road” (2019) te chiah a pha lo a, karleh chart-ah a No.1 leh thei a nih chuan record a rawn nihrual thei tawh dawn a ni. Hmeichhe zaithiam zingah chuan Krismas rimnam hla ni lo he chart-a No.1 rei pui thei ber a ni bawk.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni a, “Choosin’ Texas” hian kar khat chhungin stream maktaduai 25, radio airplay ngaithlatu maktaduai 54.6 leh sales 8,000 a la nei thei a, hei hi a kar 18 nan chart-ah a No.1 pui leh ta a ni.
“Choosin’ Texas” hi Langley hla zinga he chart-a No.1 thei hmasa ber a ni a, Langley hi country singer niin, country hla chauh record thin zingah he chart-a hla pakhat No.1 nih reipui thei ber a ni a, Hot Country Songs chart-ah phei chuan kar 36 chhung he hla hi No.1 a ni tawh bawk a, heng chart pahnih a No.1 ni kawp rei thei ber a ni bawk.
Chart No.1 hlui Taylor Swift “I Knew It, I Knew You” chu No.5 atangin No.2 a kai thar leh ta a, Morgan Wallen “Been by Now” chu No.3-ah bawk a la awm a, Stella Lefty “Boston” chu No.6 atangin No.4 a kai thar ve leh ta a, chart No.1 hlui Ariana Grande “Hate That I Made You Love Me” chu No.2 atangin No.5-ah a tawlh ve thung.
Morgan Wallen leh Ella Langley “So Easy (To Fall in Love)” chu No.9 atangin No.7 a kai thar ve leh ta a, Tame Impala leh JENNIE “Dracula” chu No.8-ah bawk a la awm a, Ella Langley hla dang “Man I Need” chu No.11 atangin No.9 a kai ve leh ta a, a hla dang chart No.2 pawh lo ni tawh “Be Her” chu No.10-ah bawk a la awm a, tihian tunkar chart top 10-ah Ella Langley hian hla pali a nei leh ta a ni.
Billboard Hot 100 a No.1 ni rei zual te:
22 weeks, “All I Want for Christmas Is You,” Mariah Carey, 2019-26
19, “A Bar Song (Tipsy),” Shaboozey, 2024
19, “Old Town Road,” Lil Nas X feat. Billy Ray Cyrus, 2019
18, “Choosin’ Texas,” Ella Langley, 2026
16, “Last Night,” Morgan Wallen, 2023
16, “Despacito,” Luis Fonsi & Daddy Yankee feat. Justin Bieber, 2017
16, “One Sweet Day,” Mariah Carey & Boyz II Men, 1995-96