Larsap-in NIELIT hmasawnna en

Mizoram larsap Dr Hari Babu Kambhampati chuan NIELIT (National Institute of Electronics and Information Technology) Zuangtui Aizawl chu Thawhlehni khan a tlawh a. NIELET director Dr T Gunendra Singh hoin thawktute leh zirlaiten an lo dawngsawng. Building leh hmunhma fangin, cybersecurity laboratory, electronics laboratory leh IT laboratory a tlawh.
NIELIT scientist ‘C’ C Zonunsanga chuan powerpoint presentation hmangin NIELIT dinhmun, hmalak tawhna leh hmachhawp a sawi a. Faculty aiawh leh zirlai atangin thu an sawi a ni.
Larsap chuan NIELIT chu thangkhat lian chauha upa a ni na in, mi sang tam takin an chhawr tangkai tawh a, tunah Lunglei NIELIT Extension Centre bunfel a ni tawh chu a lawm hle tih a sawi.
“Information technology khawvela kan chen tawh avangin Prime minister kaihhruai sawrkar laipuiin Digital India campaign a duang chhuak a, ngawrh takin a kalpui mek. Kum 2047 ralhma ngeia India chu ram hmasawn leh changkang (Viksit Bharat) nih tir hi Prime minister thiltum ber pakhat a ni,” a ti.
Ram hmasawn leh changkang ni tur chuan mitin chu ‘digitally literate’ kan nih phawt a ngai, tiin, chutah chuan NIELIT-in mawhphurhna lian tak a nei tih Dr Hari Babu Kambhampati hian a sawi a ni.
NIELIT thuneitute chuan artificial intelligent (AI) laboratory din chungchang, NIELIT chu Deem University-a pawm mai tur a nih tawh avanga ram an mamawh belh dan, LDC hna dil nan NSQF (National Skills Qualifications Framework) aligned certificate pawm sak ve tura duhna an lo thlen a. Larsap hian bawhzui a tum thu a hrilh a ni.