‘Buhfai a ni lo, ration card zawk a ni’

Mizoram leh Tripura-in an state huam chhunga an chhal ve ve Phuldungsei-ah Mizoram ration card-a hming chuang mi 80 chuang paih an ni a, hei hian khel zui a hlawh hle.
“Na kan ti a, mak kan ti a. Mizoram mi nih kan duh em em a, Mizoram pawhin kan khua hi Mizoramah an chhalah kan lo ngai a, mahse kan hming an thai chhiat hian Mizoram mi atan min duh lo tihna a ni,” Phuldungsei pa pakhat chuan a ti.
Mizoram sorkarin ration card-a an hming thai chhiat ni mah se buhfai a pe leh dawn tih thu puan chhuah a ni tawh a, Phuldungsei pa pakhat, a hming tarlan duh loh chuan, “Buhfai a ni lo, ration card zawk a ni. Buhfai duh ngawr ngawr kan ni lo, Mizoram ration card neih a ni kan duh chu,” a ti.
“Mizoram sorkarin buhfai min pe se, ration card nei lo ila. Chu ai chuan Mizoram ration card nei ila, buhfai min pe lo thung se, chu chu ram leh hnam tan a hlu zawk,” a ti bawk.
Phuldungsei-a cheng, hemi chungchanga biakte chuan state pahnih ration card an neih thu hi Tripura sorkarin a hre reng tih an sawi a, Mizoram ration card kan nei tih an hria a, mahse Tripura sorkar hian kan hming hi paih a tum lo an ti.
An sawi danin, an bul vela hnam dang, vai leh Tuikuk-in an hek fo a, Tripura sorkar hian a lo en chiang tawh thin, mahse an hming a paihsak lo. Min hektute lung tihawi nan official hi a hmingin an rawn tir a, mahse kan hming an paih chuang lo an ti a, chutiang a nih laia Mizoramin an hming a thai chhia hi mak an tih thu an sawi.
“Ration card pahnih kan nei ang chu! Kha chen kha Tripura hnuaiah kan awm a, Mizoramin tun hnaiah min rin luh tumin ration card min rawn siamsak a, a nei sa kha a dang min pe a, pahnih kan nei reng ang chu,” pa pakhat chuan a ti.
“Mizoram nih kan duh a, Mizoram pawhin min duhah kan ngai a. Chutiang a nih laia ration card inpaihsak hi chu na kan ti,” a ti bawk.
Mizoram ration card-a hming paih mi 85-te hian Tripura ration card hmangin buhfai an la a, Mizoram ration card-a an hming a chuan leh theih nan Mizoram sorkar an nghak an tih an sawi.
“NLUP kan dawng a, ni za inhlawhnaah Mizoramah kan tel tih te, Mizoram VC a ding tih te, Mizoram ration card kan nei tih te, Tripura sorkar hian a hre vek a, mahse min ti Tripura lui tlat mai a, an fei tak tak a ni,” Phuldungsei pa challang tak pakhat chuan a ti.