Enkawl hautak tak anga Lengpui Airport sawi hi a dik famkim lo – MNF
Lengpui Airport chuan hlep nei pha lo mah se, enkawl hautak tak anga sawi erawh a dik famkim loa, mipuiin kan chhawr tangkai dan nena bukin Air Force kuta hlan hial duhna khawp tur niin a lang lo tih MNF party chuan an sawi.
MNF Media & Publicity hruaitute J Malsawmzuala Vanchhawng sawi danin, ZPM sawrkar din tirh atangin Lengpui Airport thehthang dan tur a dap nghal char char leh, Indian Air Force (IAF) kuta hlan mai a duh dawn nia lang chu MNF chuan a duh lo tih a sawi.
2023 December 14-a Council of Ministers thukhawm chuan midang kuta Lengpui Airport hlan dan dap a rel a, a zirchiang tura din Working Committee-in chief minister hnena rawtna an thlenah IAF kuta hlan rawtna a lang nia sawiin, “Sawrkar awm tawhten harsatna tam tak paltlanga an din leh harsa taka an lo tih changtlun chhoh, Mizoram tana ro tling (asset) pawimawh tak ZPM sawrkarin thehthang a tum dan hi mipui pawisawina nasa tak a nih dawn avangin MNF chuan a pawmpui thei lo a, a tawp thlenga dodal a tum,” a ti.
Hmun danga civil airport anga hman, IAF thuhnuaia awm – Silchar, Tezpur, Jorhat, Chhabua, Baghdogra leh Hasimara ho ang bawkin, than zel chu sawi loh, thlawhna service awm mek pawh a tlem zel dawn tih MNF Publicity vice chairman hian a sawi a. Indona atana puahchah a nih dawn bakah indona lo awm se hmelmate tinzawn hmasak tur zing ami a nih dawn avangin a tuartu chu Mizoram mipui kan ni dawn tih a sawi a ni.
Lengpui Airport chu a than chak avang leh a sum thawh chhuah a pun zel avangin sawrkar hmasa atang tawhin AAI (Airport Authority of India) nen indawr a ni tawh thin a, Mizoram tana ro hlu hlu tak a nih avangin midang kuta hlanchhawn dan turah sawrkar kal tawhten uluk takin ngaihtuahna an seng thin a. AAI hotute leh Civil Aviation hotute pawh tum 16 an thukhawm tawh a, Mizoramin a hlawkpui tur leh Mizo mipui pawhin an pawm tlan theih tur inremna a la awm thei lo tih J Malsawmzuala hian a sawi.
“AAI kutah emaw company kutah emaw hlan hi MNF hian a dodal ngawt lo a. Kan airport neihchhun ti chhe vek tur zawnga Indian Air Force kuta hlan tumna erawh a tawp thlenga dodal kan tum,” a ti.