Eiruk do hi..

Tunhnaia Synod puipaten chief minister an hmuhnaah khan, kohhranin tha taka sawrkar thawhpui an duh thu chief minister an hrilh a. Hei bakah hian, Synod-in corruption do a rel bawhzuiin sawrkara thlen tur chi an neih, Lok Ayukta tihchak, loh theih loh chauha restricted tender kalpui, project cost ennawn tih bo, contract hralh chhawn tihbo, tihte pawh chief minister hnenah hian an thlen a; eiruk do tura kohhran huang chhunga hma lak an tum dan chief minister hi an hrilh bawk.
Synod puipaten, chief minister hnena ‘eiruk do tura kohhran huang chhunga hma lak an tum dan’ an hrilh hi chu mipui lam chuan chipchiar takin kan zuk hre ve kilh kelh pha lo a, mahse, Synod puipaten hetianga hmalak an tum dan ram hruaitu lu ber hnena an thlen tawh chuan, eirukna a kiam phah viau loh pawhin, eirukna hluar zel tur chu a veng ngei tura ngaih a ni.
Mizote hi sakhuana la urhsun tak kan ni a tih theih mai awm e. Hnam dang lo zinte hian, Pathiannia biak buk lama mipui kan han bibo duak a, khawlai a han reh ruai maite hi khawharthlak an tih thu an sawi thin a. Mizote chu sakhuana lama inpe zo tak, chumiin a hrin chhuah, khawtlang leh ram inrelbawlnaah pawh felfai taka thil ti duh mi ni turah min ngai thin. Chu chu kan lan dan a ni thei a, hnamdangte pawhin min ngaihdan a ni thei bawk; mahse, a ni si lo hi kan buaina ber chu a ni ta a ni.
Mizorama Mizo mipuite hi kan fel vek lova, kan sual vek hek lo. Amaherawh chu, harsatna kan neih táka chu, sakhuana la urhsun tak hnam kan nih mek laiin, chu chuan ram inrelbawlnaah a tha lamin nghawng a nei lo mai ni lovin, sakhaw rawngbawltu puipate meuh pawh an mangangin, ram hruaitu lu ber hnenah, eirukna do tura kohhran huang chhung atanga hmalak an tum thu an thlen ta hial a ni a. A khawi lai berah hian nge dik lo tan tih hi hriatthiam a harsa ta hle a ni.
Eirukna kan do kan tih hian, eirukna a lo thlen theih chhan, a ‘loopholes’ lam hnawh phui tum si lova a ler lam atanga thuai nghek nghek hi kan kalphung ni deuh ber mai em aw, a tih theih awm e. Eirukna a thlen theih chhan hi, a tawi zawng chuan, system zawm loh vang a ni ber a, kohhran puipaten an vei point hrang hrangte pawh khi, system zawm loh vang vek a ni. System anga kal thlap thlap tur chuan a lu ber atanga ‘rik thak thak’ a ngai, tih hi eiruk dona tura bul tan nan chuan a sawt ber mai awm asin.